کاظمي: نړیوال دې ایران کې له مېشتو افغان کډوالو سره مرسته وکړي

د ایران د عدلیې د وزیر مرستیال علي کاظمي وايي، هېواد یې د ۶۳ سلنه افغان کډوالو کوربه دی. د ایران مهر خبري اژانس پرون د کاظمي له قوله راپور ورکړی چې نوموړي له نړۍوالو مرستندویه موسسو وغوښتل چې د افغان کډوالو د اړتیاو په هواري کې له ایران سره همکاري وکړي. کاظمي دا خبره د ماشومانو د ساتنې په اړه په یوه سیمینار کې وکړه. هغه زیاته کړه چې په ایران کې د جګړو او طبیعي پېښو له امله زیات شمېر افغان کډوالو پناه اخیستې ده. کاظمي ټینګار وکړ چې ایران له رنګ، نژاد، قومیت، توکم او مذهب پرته له افغان کډوالو سره په ځانګړې توګه د دغو کډوالو له ماشومانو سره ښه چلند کوي. په همدې حال کې په ایران کې یو شمېر افغان کډوال تل د ایراني چارواکو له ناوړه چلند څخه شکایت کوي.