کندز کې؛ پر یو کور د هوان مرمۍ لګېدو درې ماشومان وژلي

د کندز ولایت د دشت ارچې ولسوالۍ ځینې اوسېدونکي وایي چې په دغه ولسوالۍ کې پر یو کور د هاوان مرمۍ لګېدو له امله د یوې کورنۍ درې ماشومان وژل شوي او درې نور ټپیان دي. دوی وایي، چې د امنیتي ځواکونو له لوري توغول شوی هاوان تېره شپه ارباب سیمه کې د ملکيانو پر کور لګېدلی دی او یاده مرګ ژوبله یې اړولې ده. د کندز ولایت یوې امنیتي سرچینې پېښه تایید کړې ده خو د دغه ولایت چارواکو تر اوسه په دې اړه څه نه دي ویلي. دا لومړی ځل نه دی چې په کندز کې د امنیتي ځواکونو له لوري د هاوان توغندی ملکیانو ته مرګ ژوبله اړوي؛ بلکې دوه ورځې وړاندې په غزني کې هم په ورته یوه پېښه کې د یوې کورنۍ څو غړو ته مرګ ژوبله اوښتې وه.