کورنیو چارو وزارت: هېواد کې د نشه يي توکو کرکېله صفر شوې ده

د جون ۲۶مه له نشه یې توکو سره د مبارزې نړیواله ورځ ده، له دې وړاندې به افغانستان د نشه یي توکو تر ټولو لوی تولیدوونکی هېواد بلل کېده، خو سږ کال دا ورځ په افغانستان کې په داسې حال کې را رسېږي چې سرپرست حکومت وایي، په هېواد کې د نشه یي توکو کر کېله صفر شوې ده. که څه هم په هېواد کې  د نشه یي توکو د کرکېلې په اړه ځینې راپورونه خپریږي، خو د کورنیو چارو وزارت د مرستیال ویاند بسم الله حبیب دغه راپورونه ناسم بولي. د حبیب په خبره، په تېر ۲۰۲۲ او روان ۲۰۲۳ کلونو کې پر ۲۲ زره او ۴۳۰ هکټاره ځمکه کې کرل شوي کوکنار له منځه وړل شوي دي. نوموړی زیاتوي چې په تېر یو کال کې له ۸۲ زرو ډېر په نشو روږدي کسان ټول د درملنې لپاره بېلابېلو روغتونونو ته ور پېژندل شوي.