یوناما د نشه یي توکیو پر ضد د سرپرست حکومت مبارزه ستایلې

د یوناما مرستیال مارکس پوتزل د کورنیو چارو وزارت له چارواکو سره لیدلي. کورنیو چارو وزارت د یوې خبرپاڼې په خپرولو سره ویلي چې پوتزل په دغې لیدنه کې د نورو وسله والو ډلو په ځپلو او له نشه‌يي توکو سره د مبارزې او اداري فساد په برخو کې د کورنیو چارو وزارت د مشرتابه هڅې ستایلي دي. خبرپاڼه کې راغلي چې په دغې لیدنه کې د کورنيو چارو وزارت لومړي مرستيال ډاډ ښودلی، چې د امنيتي ځواکونه په تېره ملي پوليس د يوناما د ټولو دفتري څانګو، سفارت خونو او نورو بهرنيو بنسټونو د امنيت ټينګښت خپل لومړيتوب ګڼي او ډاډ يې ورکړ، چې ټول بهرني بنسټونه چې له سرپرست حکومت سره د همکارۍ لېوالتيا لري او په سوله‌ييزه فضا کې کولی شي خپلو همکاريو ته دوام ورکړي.