اسلام اباد کې درې پوهنتونونه د امنیتي ګواښونو له امله وتړل شول

د پاکستاني رسنیو د راپورونو له مخې د پاکستان په پلازمېنه اسلام اباد کې د امنیتي ګواښونو له امله درې پوهنتونونه تړل شوي چې له امله یې د زده‌کړیالانو کلنۍ ازموینې هم اغېزمنې شوې دي. پاکستاني رسنیو راپور ورکړی چې امنیتي ادارو نن په اسلام اباد کې د بحریه، اییر او نېشنل ډیفینس پوهنتونونه د امنیتي ګواښونو له امله تر نامعلومې مودې وتړل. د یادو پوهنتونونو څخه سرچینو ویلي چې، تر نامعلومې مودې د پوهنتونونو د تړلو په اړه تېره شپه ناخته خبر ورکړل شوی دی. بل خوا د اسلام اباد پولیسو ویلي چې، په اسلام اباد کې د ټاکنو او د اسلام اباد پریس کلب مخې ته د بلوڅو پرلت له امله یې امنیتي چمتوالی لا له وړاندې سخت کړی. همدارنګه د امنیتي ادارو له لوري خبر ورکړل شوی چې تېره شپه یې د اسلام اباد ښار په شاوخوا سیمو کې هم د لټون عملیات پیل کړي دي.