د اسيا د نولسمې دورې لوبې د سپتمبر د ۲۳مې نېټې په ماښام د چين د جه جيانګ ولايت په هانګ جو ښار کې په رسمي توګه پرانيستل شوې. د دغو لوبو پرانيستونکي مراسم په اسيا کې د څپو راپورته کولو (Tides Surging in Asia) تر عنوان لاندې تر سره شول او په مراسمو کې د اوبو په اړه ډېر تصويرونه ليدل کېدل، په دې مانا و چې د نوې زمانې چين له اسيا او نړۍ سره د پيوستون جريان د غځېدلې څپې په شان پرمخ روان دی.
دا درېيم ځل دی، چې د اسيا لوبې د چين په کوربه توب جوړېږي. چين په ۱۹۹۰م او ۲۰۱۰م کال کې په جلا جلا توګه په بېجينګ او ګوانګ جو ښار کې د اسيا لوبې تر سره کړې.
د اسيا المپيک شورا د ټولو ۴۵ غړو هېوادونو او سيمو له ۱۲ زرو زيات لوبغاړي د هانګ جو په اسيايي لوبو کې ګډون لري. د لوبو پر مهال به د ۴۰ رشتو سيالۍ تر سره شي، چې د اسيا عمده او مهمې سپورټي لوبې پکې شاملې دي او د اسيا دودیز سپورټي کلتور څرګندويي کوي. لويه پيمانه، د سپورټي رشتو زيات شمېر او پراخه برخه د هانګ جو د اسيايي لوبو ځانګړتياوې بلل کېږي. له دې څخه د چين ستره اغېزه او د اسيايي خلکو توده تمه او ټينګ ملاتړ ښودل شوی دی.
اسيايي لوبې په دې لویه وچه کې کې تر ټولو لوړې کچې سپورټي لوبې دي او د سولې، يووالي او ټولشموليت په اړه د اسيايانو نېکې هيلې انعکاس کوي. د چين دولت رئيس د هانګ جو د اسيايي لوبو د پرانيستونکو مراسمو د ګډونوالو مېلمنو د هرکلي مېلمستيا ته په وينا کې د دغو لوبو په اړه هيله ښودلې، چې د سپورټ له لارې دې سوله، يووالی او ټولشموليت وهڅول شي.
د اسيا اقتصاد په تېرو لسيزو کې د دې سيمې د عمومي وضعيت د ارامۍ او ثبات له برکته چټک پرمختګ کړی او د نړيوال اقتصاد په عمومي اندازه کې يې له ۴۰ سلنې زياته ونډه نيولې. د پيسو نړيوال صندوق د اټکل له مخې، سږ کال به د نړيوال اقتصاد د پرمختګ لپاره د اسيايي سيمې د خدمت ونډه له ۷۰ سلنې څخه اوښتې وي. اسيايي لوبې د اسيايي معجزې د جوړولو په بهير کې د شاهد، ګډون کوونکي او هڅه کوونکي رول لوبولی دی. د دې وضعيت پر وړاندې چې له اسيا څخه بهر يو شمېر هېوادونه د سړې جګړې په نظر په اسيا کې د شخړو زېږول او د سيمه ييزې سولې او ثبات ويجاړول غواړي، اسيايان هيله لري، چې د سپورټ له لارې د سولې غږ پورته کړي او د ګډ کور آرامتيا وساتي.
اسيا يوه لويه کورنۍ ده او يووالی د اسيايي لوبو د جوړېدو له اصلي موخو څخه دی. د لومړۍ دورې اسيايي لوبې په ۱۹۵۱م کال کې د هند په نوي ډيلي کې په داسې حال کې تر سره شوې، چې د اسيا ډېری هېوادونو يو پر بل له استعماري تسلط څخه وتلي او خپلواکي او ازادي يې خپله کړې وه. اوسمهال يووالی او دوستي د اسيايي لوبو په اړه د خلکو په خبرو کې ډېره يادېږي. ((زړه په زړه، @راتلونکی))(Heart to Heart, @Future) د هانګ جو اسيايي لوبو د شعار په توګه ټاکل شوي او دغه شعار د اسيايانو ګډ غږ څرګندوي. د نيپال صدراعظم پراچندا ويلي، چې د اسيايي لوبو موخه د اسيايانو د دوستۍ، يووالي او سمسورتيا هڅول دي. د المپيک نړيوالې کمېټې غړې پاټاما ويلي، چې د هانګ جو اسيايي لوبو د سپورټ له لارې د ګډونوالو ترمنځ تفاهم او اړيکې پياوړې کړې دي.
سپورټ بهر ته د يوه هېواد د نندارې کړکۍ ده. د هانګ جو اسيايي لوبو اسيا او نړۍ ته پرانيستی، له شوق او ذوق ډک او عصري چين ښودلی دی. جه جيانګ ولايت د خلکو د ګډې شتمنۍ نمونوي سيمې د ابادۍ په هڅه کې دی او د چيني شکله عصري کېدو چارو مخکښ دی. د دغه ولايت هانګ جو ښار د ډيجيټلي اقتصاد په برخه کې د چين له فعالو ښارونو څخه دی. د هانګ جو اسيايي لوبو په لومړي ځل (( ځيرکتيا)) د اسيايي لوبو د تنظيم په مفکوره کې شامل کړی. د ځيرکتيا يو لړ پياوړې ټېکنالوژۍ د دغو لوبو په خدمت کې کارول شوې دي.
د اسيا د المپيک شورا سرپرست رئيس راجا راندهير سينګ د هانګ جو د اسيايي لوبو په اړه ويلي، چې باور لرم چې موږ به د تاريخ بې سارې سترې اسيايي لوبې وګورو.
خلک به په راتلونکو ۱۶ ورځو کې نه يوازې د لوړې کچې له سپورټي سياليو څخه خوند واخلي، بلکې د ختيځې نړۍ کلتور او سپورټي روحيې ترمنځ پيوستون به احساس کړي.
د هانګ جو اسيايي لوبې به د اسيايانو تر ټينګ ملاتړ لاندې د المپيک لوبو د پرمختګ او د اسيايي خلکو د يووالي او دوستۍ د پياوړتيا لپاره خدمتونه وکړي.
