افغان پلاوي په بیلاروس کې له صنعتي او تولیدي شرکتونو لیدنه کړې ده

د افغانستان د کرنې، اوبو لګولو او مالدارۍ وزیر عطاالله عمري په مشرۍ پلاوي په بیلاروس کې د غلو دانو، خوراکي توکو، لبنیاتو، بورې، غوښې او حیواني درملو له دولتي او خصوصي شرکتونو لیدنه کړې ده. د دغو لیدنو موخه د بیلاروس له صنعتي او تولیدي ظرفیتونو او تجربو څخه د افغانستان ګټه اخیستل ښودل شوي دي. په دې لیدنو کې د کرنې، مالدارۍ، د کرنیزو محصولاتو د پروسس او حیواني درملو د تولید په برخو کې د ګډې همکارۍ پر فرصتونو خبرې شوې دي. بیلاروسي لوري د افغان متخصصینو د ظرفیت لوړولو او د تجربو د لېږد په برخه کې د همکارۍ ډاډ ورکړی دی.