ایران؛ هرمز تنګي ته څېرمه پر ۱۰ بېړیو د برید خبر ورکړی

ایران د چهارشنبې په ورځ ویلي، د امریکا له لوري د پنځو ایراني تېلو وړونکو بېړیو له ډوبولو وروسته یې هرمز تنګي ته څېرمه پر ۱۰ بېړیو برید کړی دی. د رویټرز د راپور له مخې، په دغو بریدونو کې لږ تر لږه یو سمندري کارکوونکی وژل شوی او یو بل لادرکه دی. د وروستیو بریدونو له امله د تېلو بیې هم لوړې شوې او د برېنټ خام تېلو بیه د لومړي ځل لپاره له جولای راهیسې له ۱۰۰ ډالرو اوښتې ده.  ایران همداراز ویلي چې د اردن پر هغې پوځي اډې یې بالستیک توغندي توغولي چې امریکايي ځواکونو ترې کار اخیست.