ایران: افغان پولې ته څېرمه نښته کې یو پوځي وژل شوی   

د ایران رسمي خبري اژانس راپور ورکړی دی چې له افغانستان سره پولې ته نږدې یې له وسله والو سره په نښته کې یو پوله ساتی وژل شوی دی. ایرنا خبري اژانس راپور ورکړی دی چې دا پېښه تېره ورځ ناوخته افغان پولې ته څېرمه د سیستان بلوچستان ولایت په مربوطاتو کې رامنځته شوې ده چې په نتیجه کې یې یو پوځي وژل شوی او دوه نور ټپيان شوي دي. ایراني چارواکو ویلي چې وسله والو اشرارو د افغانستان له لوري پر ایراني پوله ساتو برید کړی دی چې د دوی د پوځیانو له سخت مقاومت سره مخ شوي دي او په متقابلو ډزو کې څلور وسله وال هم وژل شوي دي. د یاد برید پړه تر اوسه پورې کومې وسله والې ډلې پر غاړه نه ده اخیستې.