ایران او وینزویلا د اقتصادي او نظامي همکاریو ۲۰ کلن تړون لاسلیک کړی

وينزويلا او ايران د اقتصادي او نظامي همکاريو شل کلن تړون لاسليک کړی دی. د وينزويلا ولسمشر نيکولاس مادورو چې د خپل هيواد له ځينو نورو چارواکو سره په همدې موخه تهران ته تللی وو، د تړون تر لاسليکولو مخکې وويل چې ايران او وينزويلا د نړيوالو مسايلو په تړاو ګډ ليدلوری لري او دواړه د امريکا د اجباري بنديزونو قربانيان دي. مادورو وويل چې هيواد به يې له ايران سره يو ځای د مقاومت سياست ته مخه کړي او چا ته به اجازه ورنه کړي چې د فشار له لارې پرې خپلې غوښتنې ومني. د ايران مذهبي مشر ايت الله علي خامنه يي، تهران ته د وينزويلايي چارواکو د سفر مننه کړې او ويلي يې دي چې د امريکايي بنديزونو سره د مقابلې تر ټولو غوره لاره مقاومت دی. ايران او وينزويلا د خپلو ناسمو بهرنيو سياستونو او بې ثباته کوونکو پاليسيو له کبله د نړۍ له سختو اقتصادي بنديزونو سره مخ دي. دا بنديزونه دومره سخت او درانه دي چې د چارو د شنونکو په باور، د ايران اقتصاد يې له بشپړې ماتې سره مخ کړی دی.