ایران له افغانستان سره نوی سوداګریز بندر پرانیزي

د ایراني رسنیو د راپورونو له مخې ددغه هېواد د خراسان رضوي ولایت چارواکو له مرکزي حکومت سره په ګډه پرېکړه کړې چې د سوداګرۍ د لا پراختیا لپاره له افغانستان سره نوی سوداګریز بندر او ګمرکي تاسیسات جوړ کړي. ددوی په خبره نوی بندر به په شمتیغ سیمه کې جوړېږي. دا هغه سیمه ده چې د هرات خواف رېل پټلۍ ترې تېرېږي او ایراني حکومت پرېکړه کړې چې په همدې سیمه کې به بل سوداګریز بندر هم پرانیزي. ایراني چارواکي وايي چې اوس د سوداګریزو توکو د ډېروالي او په اسلام کلا بندر کې د ظرفیت د کموالي له امله په شپو شپو د سوداګرو توکي په ګمرکونو کې پاتې کېږي چې د نوي بندر په پرانیستلو سره به دا ستونزه حل شي.