بلغاريا کې د ۱۸ افغانانو د مړینې په تړاو ۷ کسان نیول شوي

بلغاریایي چارواکو ویلي یوه ورځ وروسته له هغه چې د ۱۸ افغانانو جسدونه له پلازمینې صوفیا څخه بهر په یوه لارۍ کې وموندل شول، د هغه هېواد پولیسو د پېښې په تړاو اوه تنه نیولي دي. لومړنۍ څېړنې ښيي چې دغې لارۍ ۵۲ کسان لېږدول چې د لرګیو تر تختو لاندې یې پټ کړي وو او ۱۸ تنو یې د ساه بندۍ له امله ژوند له لاسه ورکړ. د افغانانو دغه ډله له ترکیې څخه د بلغاریا له لارې د لویدیځې اروپا په لور روان وو. د بلغاریا د کورنیو چارو وزارت یوه چارواکي فرانس پرس خبري اژانس ته تایید کړې چې اوه کسان نیول شوي دي. دغه راز یو بل چارواکي ویلي چې د قاچاقبرانو د ډلې مشر هم په دغو نیول شویو کسانو کې دی او په وینا یې هغه دمخه هم د انسانانو د قاچاق کولو په تور پنځه میاشتې بند تېر کړی دی.