د چین د بهرنیو چارو وزارت ویاند لین جیان د مارچ په ۱۷مې نېټې د یوې خبري ناستې مشري کړې او د افغانستان او پاکستان ترمنځ د شخړې په اړه يې د خبریال پوښتنې ته په ځواب کې ویلي، چې دغه دواړه هېوادونه نه بدلېدونکي ګاونډیان دي او ترمنځ يې ډیالوګ د خپلمنځي مسئلو د حل یوازینۍ اغېزمنه لاره ده.
نوموړي ويلي، چین هیله لري چې دواړه خواوې له زغم او حوصلې کار واخلي، په نږدې وخت کې اوربند او مخامخ خبرې وکړي.
بېجینګ له کابل او اسلام اباد څخه غوښتي، چې د چیني اتباعو، پروژو او ادارو خوندیتوب ته جدي پاملرنه وکړي.
لین جیان ويلي، چین به د افغانستان او پاکستان د اړیکو د ښه والي په موخه پر له پسې رغنده رول ولوبوي.
