خامنه یي: له امریکا سره د اټومي پروګرام په اړه روان وضعیت نه حل کېدونکې دی

د راپورونو له مخې د ایران ستر مذهبي مشر ایت‌الله علي خامنه‌يي له امریکا سره د اټومي پروګرام په اړه روانه ترینګلتیا نه حل کېدونکې بللې او ټینګار یې کړی چې دوی به امریکا ته تسلیم نه شي. ایراني رسنیو پرون د خامنه‌يي له قوله راپور ورکړی چې نوموړی له امریکا سره روان وضعیت «نه حل کېدونکی» بولي. خامنه یي داسې مهال دا څرګندونې کړې چې ایران له لویدیځو هېوادونو سره د خپل اټومي پروګرام پر سر جنجال لري. تهران له هغې وروسته له امریکا سره اټومي خبرې ودرولې چې امریکا او اسراییل په جون میاشت کې د ۱۲ ورځنۍ جګړې پر مهال د ایران پر اټومي تاسیساتو هوایي بریدونه وکړل. دغه راز، تېره جمعه ایران او اروپايي هېوادونو هوکړه کړې چې د ایران د یورانیمو د غني‌کولو د محدودولو په اړه بشپړې خبرې بیا پیل کړي.