د امريکا ولسمشر ډونالډ ټرمپ د جون په ۲۱مې نېټې ومنله، چې ځواکونو يې د ايران پر درېيو اټومي تاسيساتو بريدونه کړي دي.
د کارپوهانو په اند، امريکا د اسرائيل او ايران په جګړې ورګډه شوې او د منځني ختیځ وضعيت يې نور هم پسې سخت کړی، چې دا به نه يوازې په سیمې، بلکې پر نړۍ هم پراخې بدې اغېزې ولري.
د ټرمپ حکومت لوی قيمار
ډونالډ ټرمپ د جون په ۲۱مې نېټې رسنيو ته ويلي، چې ځواکونو يې د ايران درې « فردو، نطنز او اصفهان» اټومي تاسیسات له منځه وړي دي.
د امريکا فوکس نيوز په همدې ورځ پر خپلې وېبپاڼې خبر ورکړی، چې امريکايي ځواکونو د ايران پر فردو اټومي تاسيساتو په بريدونو کې شپږ هغه ويجاړوونکي بمونه، چې د ځمکې لاندې د تاسيساتو دننه چاودېږي، کارولي او د دغه هېواد پر نورو اټومي تاسيساتو يې دېرش توغندي ويشتلي دي.
تسنيم خبري اژانس د جون په ۲۲مې نېټې د ايراني چارواکو په قول ويلي، چې امريکا د ايران پر درېیو « فردو، نطنز او اصفهان» اټومي تاسيساتو بريدونه کړي دي.
د ايران په پارلمان کې د قم ولايت استازي محمد منان ريسي رسنيو ته ويلي، چې د امريکايي ځواکونو په بريدونو کې د فردو اټومي تاسيسات ډېر نه دي زيانمن شوي.
نیويارک ټايمز د ايران پر اټومي تاسيساتو د امریکا هوايي بريدونه لوی او خطرناک قيمار بللی دی.
خبر وايي، د ټرمپ د حکومت دغه قيمار په امريکا او هم د جمهوريپال ګوند دننه پراخ غبرګونونه او نيوکې راپارولې دي.
د امريکا د استازو جرګې د لږکيو ګوندونو مشر او د ډيموکراتيک ګوند غړي خاکیم جفريس رسنيو ته ويلي، چې ټرمپ د کانګرېس له اجازې پرته پر ايران پوځي عمليات ترسره کړي او امريکا يې د منځني ختيځ په جګړې کې ښکيله کړې ده.
د امريکا په استازو جرګې کې د جمهوريپال ګوند غړي توماس ميسي پر ډونالډ ټرمپ توندې نېوکې کړي او نوموړی یې له اساسي قانون څخه په سرغړونې تورن کړی دی.
د سيمې امنیتي وضعيت نور هم ترينګلی شوی
د ايران بهرنيو چارو وزير عباس عراقچي د جون په ۲۲مې نېټې پر ټولنيزو رسنيو د امريکا بريدونه وحشتناک او بې رحمه بللي او په خبره يې، دا به بدې پایلې ولري.
نوموړي ليکلي، ايران مشروع حق لري، چې د خپل ملي حاکميت او ګټو دفاع وکړي او د خپلو خلکو امنيت وساتي.
د ملګرو ملتونو عمومي منشي انټونيو ګوټرېش په يوې اعلاميې کې ويلي، چې د ايران پر اټومي تاسيساتو د امريکا بريدونو د سیمې وضعيت سخت کړی او هم يې نړيواله سوله او امنیت ګواښلي دي.
شنونکي پر دې اند دي، چې د امريکايي ځواکونو بريدونه به د شخړې د لا ترينګلتيا سبب وګرځي او دغه شخړه به نورو سيمو ته هم وغځېږي او د منځني ختیځ وضعيت به نور هم ترينګلی کړي.
پوځي عمليات او بريدونه ستونزې او شخړې نه شي حلولی
کارپوهان او شنونکي پوځي زور د نړيوالو اختلافونو د له منځه وړلو لپاره سمه لار نه بولي او پر دې اند دي، چې ښکېلې خواوې باید د خبرو اترو له لارې د ایران اټومي مسئلې ته د حل لاره ولټوي.
د ايران د اټومي انرژۍ سازمان د جون په ۲۲مې نېټې په يوې اعلاميې کې ويلي، هېواد يې پلان نه لري چې پر اټومي تاسيساتو د امريکا تر بريدونو وروسته د خپلو اټومي چارو پرمختګ ودروي.
کارپوهان وايي، د ایران پر اټومي تاسيساتو د امریکا د بريدونو له کبله به دغه مسئله لا پېچلې او سخته شي. دوی وايي، ښايي ايران اوس له خپلو اټومي پروژو څخه لاس وانخلي او د اټومي وسلو د څېړنو او ډيزاين اراده به یې نوره هم ټينګه شي.
شنونکي خبرې اترې او مذاکرات د ايران د اټومي مسئلې د حل بنسټيزه لاره يادوي او پر دې اند دي، چې ښکېلې خواوې باید د ایران اټومي مسئله په ډيپلوماتيکو او سیاسي لارو هواره کړي.
د فلسطين د سياسي چارو شنونکی عصمت منصور پر دې اند دی، له پوځي زوره ګټه اخيستل او وروستی خبرداری ستونزې او مسئلې نه شي حلولی او يوازينۍ لاره يې دا ده، چې ښکېل لوري په سياسي او ډيپلوماتيکو لارو ستونزې هوارې کړي.
