د اسيا د زېربناوو پانګونې بانک د لسمې شورا د ۲۰۲۵م کال دوه ورځنۍ غونډه د جون په ۲۴مې نېټې د چين په پلازمېنې بېجينګ کې ترسره شوه، چې د نړۍ د نږدې ۱۰۰ هېوادونو او سيمو څه باندې ۳۵۰۰ کسانو پکې ګډون کړی و.
سږکال د اسيا د زېربناوو پانګونې بانک د جوړېدو ۱۰ مه کليزه ده.
دغه بانک لس کاله مخکې يوازې ۵۷ بنسټګر غړي درلودل، خو اوس يې د غړو شمېر ۱۱۰ ته پورته شوی، د نړۍ ٪ ۸۱ نفوس او ٪ ۶۵ جي ډي پي يې تر پوښښ لاندې راوستلي، پروژې يې په اسيا، اروپا، افريقا او لاتيني امريکا کې د انرژۍ، ټرافيک، اوبو لګونې، عامې روغتيا او ډيجيټل زېربناوو په ګډون مهمو برخو کې شوي، د زېربناوو جوړولو په برخه کې يې ۲۰۰ ميليارډه امريکايي ډالره پانګې راجلب کړي او د سيمه ييز پرمختګ او څواړخيزو همکاريو لپاره يې ځانګړی رول لوبولی دی.
د اسيا د زېربناوو پانګونې بانک له تېرو لسو کلونو راهیسې د زېربناوو جوړولو په برخه کې له پانګونو ملاتړ کړی او د خلکو د ژوند په ښه والي کې يې مرسته کړې ده.
د ۲۰۲۴م کال تر پايه پورې د دغه بانک په پانګونو د جوړو شوو ترافيکي زېربناوو اوږدوالی ۵۱۰۰۰ کيلومتره ښودل شوی، چې له نعمته يې ۴۱۰ ميليونه نفوس برخمن شوی دی او دغه راز له بيا کارېدونکو انرژيو څخه په استفادې د برېښنا د توليدي تاسيساتو ظرفيت يې ۲۱ اعشاريه ۳ ګيګاواټو ته لوړ شوی دی.
د اسيا د زېربناوو پانګونې بانک د انرژيو پروژې هر کال د ۳۰ ميليونه ټنه کاربن ډای اکسایډ په اندازې د شنو خونو ګازو ايستنه کموي او د ۸ ميليونو او ۷۱۰ زرو کسانو د څښاک اوبو عرضه تامينوي.
دغه بانک د هند په ګوجرات ایالت کې د لمريزې انرژۍ د پروژې لپاره ۸۸ ميليونه امريکايي ډالره پانګونه کړې او د سيمې د برېښنا د کمښت ستونزې هواري کې يې ډېره مرسته کړې ده.
د اسيا د زېربناوو پانګونې بانک د بنګلادېش د پلازمېنې ډاکه په يوې کيلوالې سيمې کې هم د برېښنايي پروژې پانګونه کړې او د ۱۲ ميليونو او ۵۰۰ زرو کليوالو د برېښنا د کمښت ستونزه يې هواره کړې ده.
دغه بانک د ورخلاصون، ټولشموليت او ګټې- ګټې همکارۍ پر اساس ډېر پرمختګ موندلی دی.
د اسيا د زېربناوو پانګونې بانک د ۲۰۱۵م کال د ډيسمبر په ۲۵مې نېټې جوړ شوی او تراوسه ۱۱۰ غړي لري او د اعتماد درجه يې د نړۍ د درېيو لویو ارزوونکو ارګانونو لخوا تر ټولو عالي يا AAA پېژندل شوې ده.
تازه شمېرې ښيي، چې دغه بانک د ۳۲۲ پروژو پانګونو ته منظوري ورکړې او د پانګو عمومي ارزښت يې له ۶۰ ميليارډو امريکايي ډالرو څخه پورته دی او د اسيا او نورو وچو ۳۸ غړي هېوادونه يې د پروژو له نعمته برخمن کړي دي.
د اسيا د زېربناوو پانګونې بانک ياد پرمختګونه څنګه ترلاسه شوي؟
د اسيا د بنسټيزو پانګونو بانک له جوړېدو راهیسې د نړيوالتوب، نظم او لوړ معيار پر اساس رښتيني او اغېزمن کارونه کړي دي.
دغه بانک د پروژو کيفيت ته ډېره پاملرنه کوي او له نورو څواړخيزو ارګانونو سره ښې همکارۍ لري، چې د بېلګې په توګه به يې ځينو ته اشارې ولرو.
دغه بانک له څه باندې سلو څواړخيزو نړيوالو سازمانونو، سيمه ييزو پولي ارګانونو، خصوصي سکټور او خيريه بنسټونو سره د همکاريو اړيکې ټينګې کړي، د پانګو د راټولولو ځانګړې بيورو او په بهرنيو هېوادونو کې یې خپلې نماينده ګي جوړې کړي، چې پدې سره يې باور او جذابيت پرله پسې لوړ شوی دی.
د اسيا د زېربناوو پانګونې بانک رئیس جين لي چون رسنيو ته ويلي، چې بانک يې د برابرۍ، ورخلاصون او ټولشموليت پر اساس د څو اړخيزو همکاريو پر ماډل ټينګار لري، چارې د ګډو مشورو له لارې پرمخ بیايي، د بېلا بېلو خواوو ګډ نظرونه راټولوي او څواړخيزم په عمل کې پلی کوي.
نوموړي ويلي، د اسيا د زېربناوو پانګونې بانک له خپلو غړو هېوادونو سره يوازې مالي مرستې نه کوي، بلکې پرمختيايي تجربې او پوهې هم ورسره شريکوي، چې دغه ډول مرستې يې تر پيسو ډېرې ارزښتناکې دي.
