د جنوبي افريقا د ډيپلوماتيکو تګلارو مشهور فکري مرکز ((د جنوبي افريقا د نړيوال ډيالوګ څېړنيز مرکز)) د ډسمبر په اتمه نېټه ((د بایډن حکومت او افریقا، د نړيوال نظم د بدلون حال کې)) تر عنوان لاندې راپور خپور کړ. دغه راپور وايي، د امريکا حکومت د افریقا په اړه خپلې تګلارې تل د خپلو ګټو په موخه ټاکلې، هغه ژمنه يې نه ده عملي کړې چې وايي افريقا ته به ګټې ورسوي او د ډيموکراسۍ په پلمه يې پر افريقا تسلط او باداري کړې ده. د ياد راپور د خپرولو په مراسمو کې ډېرو ګډونوالو په اشارې وويل، امريکا د افريقا په اړه تګلارې له نورو لویو هېوادونو سره د سيالۍ په موخه ټاکلې، دغه هېواد افريقا ته متقابل درناوی نه لري او کړو ژمنو ته يې د عمل جامه نه ده ور اغوستې، دغه راز د امريکا او افريقا سرمشريزه چې ژر به پيل شي، ښايي يوازې سياسي ډارمه وي.
په دغه راپور کې ويل شوي، د افريقا په اړه د امريکا د سټراټيژیکې ډيپلوماسۍ اصلي هدف دا دی چې افريقايي هېوادونه په نړيوال امنيت، نړيوال جوړښت او د لویو هېوادونو په سيالۍ کې د امريکا په مشرۍ ډلګۍ انتخاب کړي. د امريکا حکومت له افریقا سره د دغه هېواد د پرمختګ پر وړاندې خنډونو په لرې کولو کې اغېزمن اقدامات نه دي کړي، د افريقا په سیاسي او امنيتي برخو کې يې موجودې ستونزې نه دي هوارې کړې او له افریقايي هېوادونو څخه يوازې د چین او روسيې د نفوذ د مخنيوي په موخه استفاده کوي.
راپور وايي، امريکا په افريقا کې د خپلې قوماندانۍ په وسيله له افريقايي هېوادونو سره زياتې پوځي مرستې کړې او د پوځي روزنې په برخه کې يې ورسره همکارۍ کړې او له دې لارې غوښتي چې د بشري حقونو او ډيموکراسۍ په پلمه پر دغه هېواد خپلې اغېزې زیاتې کړي.
اټکل کېږٍي چې امریکا د پوځي امنيت او ايډيالوژۍ په پلمه د افريقايي هېوادونو په کورنيو او بهرنيو چارو کې د لا زياتې مداخلې نیت لري. برسيره پردې، په افريقا کې د امريکا د لویو عصري او تخنيکي شرکتونو نفوذ ورځ تر بلې زیاتېږي چې له دې امله ډېری افريقايي هېوادونه پر خپلو ډيجټلي چارو د حاکميت په اړه اندېښمن شوي دي او له دې ډاريږي چې امریکا په راتلونکي کې له حساسو ډېټاګانو په کار اخيستنې د افريقا ګټو ته زيان ورسوي.
همدارنګه په دې راپور کې زياته شوې، چين د افريقا په کورنيو چارو کې مداخله نه کوي او د ګډو ګټو پر اساس تګلارې غوره کوي، چې د افريقايي هېوادونو له تاوده هرکلي سره مخ شوې دي. چين له افريقا سره همکارۍ ته ژمن دی او په اقتصادي، سوداګريزو، کلتوري او امنيتي برخو کې د دواړو خواوو ترمنځ واقعي همکارۍ لاپسې پراخې شوې دي. په دې راپور کې له افريقايي هېوادونو څخه غوښتل شوي چې راويښ شي او خپل سیاسي دریځونه په هوښيارۍ وټاکي او ټينګار دې ورباندې وکړي، له خپلو ملي ګټو دې په کلکه ساتنه وکړي او ځان دې د لویو هېوادونو ترمنځ د سیالۍ نانځکه نه جوړوي.
د ياد راپور مشهور او وتلي ليکوال او د جنوبي افريقا د نړيوال ډيالوګ څېړنيز مرکز مسئول متامب د راپور د خپرولو مراسمو ته په وينا کې وويل، امریکا له افريقا سره د سرمشريزې له پيل مخې د صحرا سيمې په جنوب کې د جنوبي افريقا په اړه خپله ستراتېژي اعلان کړې او له دې ستراتېژۍ څخه ښکاري، چې امریکا لاهم افریقا ته په ناسمه توګه ګوري. له دغې ستراتېژۍ او د امریکا د ملي امنيت ستراتېژۍ څخه څرګندېږي، چې د افريقا په اړه د امریکا تګلارې له افريقا سره د دوستۍ په موخه نه، بلکې په دې وچه کې د چين او روسيې د اغېزو د مخنيوي لپاره دي.
د جنوبي افريقا جهانيسبورګ پوهنتون د افريقا او چين څېړنيز مرکز رئيس منګيه د امريکا او افريقا هغه سرمشريزه چې په نږدې راتلونکې کې به په واشينګټن کې پيل شي، ډارمه بللې او ويلي يې دي، چې د امريکا او افريقا لومړۍ سرمشريزه په امریکا کې ترسره شوه او جوړېدونکې دويمه سرمشريزه به يې هم په همدې هېواد کې ترسره شي چې دغه پرېکړه د متقابل درناوي او مساواتو له روحيې څخه سرغړونه ده. برسيره پردې په امريکا کې افريقايي الاصله امریکايان له اوږدې مودې راهيسې له سيستماتيکې توکمپالنې او تبعيض سره مخ شوي، په داسې حال کې چې افريقا د کرونا ضد واکسين ته لاس رسی نه لري، خو امریکا ګڼ شمېر واکسين زېرمه کړي او دغه هېواد ته يې د افريقایانو پر ورتګ بنديز لګولی او له دې څخه څرګندېږي چې امريکا له افريقا سره په همکارۍ کې صمیميت او صداقت نه لري.
