د اکتوبر لومړۍ نېټه د چين د ملي جشن ورځ ده او دا نېټه د چين ولسي جمهوريت د جوړېدو له ۷۵مې کليزې سره برابره ده. په دې وروستيو کلونو کې له افغانستان څخه د ځينو وزارتونو، څانګو او ارګانونو چارواکو او کارکوونکو په بېلابېلو برخو کې چين ته راغلي و او د چين د پرمختګ په هکله ژورې خاطرې ورسره دي. د دې ځانګړې ورځې د نمانځنې لپاره د افغانستان د کانونو او پيټروليم وزارت، د اقتصاد وزارت او د کليو د بيارغونې او پرمختيا وزارت اړوندو چارواکو د چين ولسي جمهوريت د جوړېدو ۷۵مې کليزې ته خپل پيغامونه ورلېږلي.
افغانستان اوس د اقتصادي بيارغونې په کليدي موده کې دی او د کانونو د استخراج له لارې پرمختګ ته په درنه سترګه ګوري. اوسمهال په افغانستان کې د چينايي تصديو لخوا تر سرمايه ګذاري لاندې دوې لويې پروژې روانې دي او پراخ راتلونکي لري. په دې برخه کې افغانستان د کانونو استخراج لوړو او مسلکي ټېکنالوژيو او کارکوونکو ته اړتيا لري.
د روان کال په مې مياشت کې د چين د سوداګرۍ وزارت په مشرۍ د کانونو د استخراج په نامه يو کورس په بېجينګ کې تر سره شوی، چې د افغانستان د کانونو او پيټروليم وزارت د اړوندو څانګو چارواکو او انجنيرانو په کې ګډون درلود. د دې وزارت د انستيتيوت رئيس مطيع الله امين حقاني په دغه کورس کې ګډون کړی او د چين ولسي جمهوريت د ۷۵مې کليزې په درشل کې د سي جي ټی ان د خبريالې ډيوې سره د اړیکې له لارې چين ته مبارکي څرګنده کړه. هغه وويل، چين ته له خپل سفر ښه خاطره لرم، د چين ولس په صنعت، زراعت، تجارت، تعليم، ورزش او په بېلابېلو کې بوخت دی او لا هم زیار ګالي، په ټينګه توګه يې د یرغلګرو څخه ځان خوندي ساتلی دی، د خلکو د نېکمرغه ژوند لپاره يې ټينګ ضمانت جوړ کړی، دا د دغه هېواد ښه سالم سياست دی. دغه راز، زما لپاره د چين ولس کورنی ژوند ډېر نېکمرغه ښکاري او ښه ثقافت هم لري، د خلکو ډېر عادتونه او دودونه د افغانستان له ولس سره نژدې دي، چې ما ته ډېر خوښېږي.
چين تل په سوله کې د پرمختګ پر لارې ټينګار کوي، د سولې، پرمختګ، همکارۍ او ګډو ګټو پر لارې قدم وهي او د نړۍ د سولې او ارامتيا او د انسانانو د ګډ پرمختګ لپاره هڅې کوي. ښاغلي مطيع الله امين حقاني وويل، چين او افغانستان ښه ګاونډي هېوادونه دي چې په تېر تاريخ کې هېڅ ستونزه په منځه کې نه ده راغلې او يو بل ته درناوی لري. خو د افغانستان ولس په تېر تاريخ کې لوی جنګونه کړي او کامياب شوي، له بدمرغه ډېرو لويو هېوادونو افغانستان په جنګي ميدان بدل کړی، خو له نېکمرغه يوازې له چين هېواد سره ښه وختونه تېر شوي دي.
زه غواړم په مستقبل کې زموږ او چين سياسي اقتصادي او کلتوري اړيکې لا نورې هم وغوړېږي، قوي شي. ځکه چين هم يو تاريخي امپراتوري تېره کړې ده او افغانستان هم يو تاريخي امپراتوري تېره کړې ده، ازاد او خپلواکه هېوادونه دي او د دواړو هېوادونو دښمن هم مشترګ دي نو په دې حالاتو کې بايد يو په بل ښه اعتماد او باور ولري چې خپل منځ کې قوي او دښمن په مقابل کې سره يو شي دا به يو ښه راتلونکي تضمين وکړي.
د هغو افغانو ملګرو په سترګو کې د چين د اقتصادي پرمختګ تجربې د افغانستان لپاره ډېرې ګټور دي، په ځانګړې توګه د چيني شکله عصري کېدو تګلارې اوس نه يوازې ځان ته بلکې نړۍ ته ګټې رسوي. د افغانستان خلک اوس ډېر غواړي خپل اقتصاد ته چټک پرمختګ ورکړي او د چين د پرمختګ له بهير څخه ګټورې تجربې واخلي. د افغانستان د اقتصاد وزارت د مطبوعاتي چارو څانګې چارواکي علاوالدين حق دوست لومړی چين ته د ملي جشن مبارکي ویلې او ويې ويل، موږ تاسو او د چين ټولو ګرانو هېوادوالو ته د چين د ملي ورځې مبارکي وایو. د افغانستان او چین ترمنځ د اقتصادي اړیکو اوسنی وضعیت د ښه راتلونکي ښکارندویي کوي، خو افغانستان او چین د یو بل لپاره ډېر اقتصادي جاذبې لري او په هر یوه کې زیاته پانګونه کولای شي، د دواړو هېوادونو په اقتصادي اړیکو کې بدلون راوړي.
د افغانستان د کليو د بيارغونې او پرمختيا وزارت د کليو د پرمختيا ادارې چارواکي محمد سليم بريالي د روان کال په جولای مياشت کې په چين کې د سوداګرۍ وزارت په مشرۍ د کليو د پرمختګ په اړوند يو کورس کې ګډون درلود او د چين ډېرو ځايونو ته يې سفر کړی. هغه د سي جي ټي ان خبريالې ډيوې ته وويل، د چين واحد ولس عصري ټېکنالوژۍ او زېربنايي پروژې زما په ذهن کې ژورې خاطرې پاتې دي. هغه چې د چين له عصري ښارونو او کليوالو سيمو څخه ليدنې وکړې او له چين سره يې هم ژورې علاقې پيدا کړې. هغه زياته کړه، چین یو ویاړلی او پرمختللی هېواد دی. زه د یوه افغان په حیث د چین ګاونډیتوب باندې واقعاً ویاړم. چین مو یو صادق او ګاونډی هېواد دی دوستي مو د هر بل هېواد نه یو بل ته مهمه ده لا تقویت یې په کار دی. په پای کې په خپل وار سره د چین با عزته ولس ته د دې لوی او مقدس ملي جنشن مبارکي وایم.
د چين ولسي جمهوريت جوړېدو د پنځه اويايمې کليزې په درشل کې د افغانستان له بېلابېلو ټولنو څخه دغه هېواد ته زياتې مبارکۍ رسېدلې دي او دا هيله ښودل شوې چې د چين او افغانستان ترمنځ دوستۍ لا نورې ټينګې شي.
