د اوکراین پلازمېنه کېیف کې درنې چاودنې شوې دي

پر اوکراين د بريدونو په تړاو د روسيې تر خبرداري وروسته په پلازمينه کېیف او نورو ښارونو کې د درنو چاودنو غږونه اوريدل شوي دي. ويل کيږي چې په اوکراين کې نن سهار وختي د خطر زنګونه هم کړنګيدلي دي. د کېیف ښاروال ویتالي کلیچکو په خپل ټېلېګرام چینل تایید کړې چې د پلازمېنې په دارنتیسکي سیمه کې چاودنې شوې دي. هغه زیاته کړې چې له چاودنو د اوښتو تلفاتو جزییات لا نه دي روښانه خو مرستندویه او ژغورونکې ډلې سیمې ته رسېدلې دي. کلیچکو پلازمېنې ته له تلونکو خلکو هم غوښتي چې دمګړۍ دې سفر نه کوي او په خوندي ځایونو کې دې پاتې شي. په اوکراین کې دا چاودنې تر هغې وروسته دي چې روسیې تازه پر کېيف د سختو بريدونو خبرداری ورکړی و. روسیې تور لګولی و چې اوکرایني ځواکونو د روسیې پر سرحدي سیمو بریدونه کړي، له همدې کبله به دوی پر کېیف بريدونه وکړي.