د بشري حقونو د څار سازمان: افغان حکومت د جنګي جنایتونو په څېړلو کې پڅ دی

د بشري حقونو د څار نړیوال سازمان وایي افغان حکومت د جنګي مجرمینو په محاکمه کولو کې پاتې راغلی دی. د بشري حقونو د څار نړیوال سازمان د اسیایي برخې مسوولې پاتریشیا ګاسمن په خپلو تازه څرګندونو کې ویلي چې له بهرنیو ځواکونو نیولې تر طالبانو او افغان پوځ پورې ټولو په تېرو شلو کلونو کې درانه جنګي جنایتونه ترسره کړي دي او باید پلټنه یې وشي. د سرچینې په خبره د جرمونو نړیواله محکمه او دغه راز افغان حکومت ددغه جرمونو په پلټنه کې پاتې راغلی او کارونه یې پڅ دي. ګاسمن د طالبانو په اړه ویلي چې دغه ډلې پر ملکي وګړو د بریدونو او ماینونو د خښولو له لارې ګڼ جنګي جنایتونه ترسره کړي او په خبره یې که یې د مشرانو نومونه له تور لېست و ایستل شي بیا به هم پر دغه ډله یاد تورونه وي او باید په اړه یې سپيناوی ورکړي.