پرته له شکه چې موږ ټول غواړو خوښ او ارام ژوند ولرو، غواړو تر نورو ډېر خوشاله او اسوده واوسو؛ خو ورځني فشارونه، ستونزې او زیات کار له موږ څخه خوښۍ تروړي.
دلته موږ د «خوښۍ راز» له کتاب څخه چې تازه پښتو ژبې ته ژباړل شوی دی، ۷ داسې اسانه فعالیتونه درته ښیو چې په تر سره کولو سره به يې تاسې خپلې ورکې خوښۍ یو ځل بیا ومومی او ژوند به مو خوشاله تیر کړی.
۱ـ له ځان سره مثبتې خبرې وکړئ!
تاسې به وایئ چې لیونی خو نه یم چې له ځان سره خبرې وکړم! نه داسې نه ده. موږ او تاسې ټول په یو ډول نه یو ډول له خپل ځان سره خبرې کوو. د دې خبرو محتوا او ډول زموږ په ذهن، روان او ژوند باندې څرګند تاثیرات لري.
خپل ځان ته ښه دقیق غوږ شئ. ایا خبرې او فکر مو مثبت دي؟ خپلې ټولې خبرې او مکالمې په مثبتو ټکو واړوئ. اورېدلي به مو وي چې وايي، یو خوشاله ذهن، خوشاله ژوند رامنځ ته کوي.
۲ـ خپلې وړې لاسته راوړنې مو وشمېرئ!
ښکاره ده چې موږ ټول عمر خوشاله نه شو پاتې کیدای او نه به هم ټول عمر ګټونکي یو؛ ولې مهمه خبره دا ده چې موږ خپلې ټولې وړې او سترې لاسته راوړنې او نعمتونه وشمېرو او د هماغه لپاره خوشاله واوسو. یانې ناهیلي ونه کړو او څه چې په لاس کې لرو، په اړه يې باید شکر وباسو.
۳ـ ټولنیزې اړیکې مو غښتلې کړئ!
ټولنیزې اړیکې او له نورو سره ښه راشه درشه د خوشاله او صحتمند ژوند درلودلو لپاره اساسي راز دی.
له ملګرو او کورنۍ سره مو خوږې او پراخې اړیکې تاسې ته ځان د ارزښت لوړاحساس درکوي او تاسې د خوشالۍ په لوري رهبري کوي.
۴ـ استراحت او کار
د خوښ ژوند درلودلو لپاره باید موږ د خپلې روغتیا خیال هم وساتو. زموږ ذهن او وجود دواړه یو له بل سره تړلي دي. خپله وجود مو په فزیکي تمرین، صحي غذاوو او مناسب خوب سره صحتمند او ارام کړئ. سالمه روغتیا او سالم ذهن د خوشاله ژوند درلودلو لپاره اساسي ستن ګڼل کیږي.
۵ـ منندوی اوسئ!
په نننۍ نړۍ کې هر څوک تر ډېره حده مصروف دي، هر څوک په خپلو خولو کې ډوب دي؛ خو مه هیروئ چې د یو چا په وړه او کوچنۍ مرسته هم ځان مه غلی کوئ؛ بلکې د هغوی د مننې او قدردانۍ لپاره وخت بېل کړئ او د هغوی مننه وکړئ. دا چاره نه یوازې دا چې هغوی خوشالوي، بلکې تاسې ته هم خوشالي دربښي.
۶ـ هره ورځ یو څه نوي زده کړئ!
هر وخت مو ذهن د نوو څیزونو په زده کولو سره تازه وساتئ، فکر وکړئ او هڅه وکړئ چې هره ورځ کم تر کمه یو نوی څیز زده کړئ. همیشه د نویو شیانو د زده کولو په هڅه کې اوسئ.
څومره چې تاسې ډېره زده کړه کوی، هومره مو نورو ته د تدریس او لارښوونې ځواک زیاتیږي. په دې سره ستاسې فکر خلاصیږي، له خلکو سره مو اړیکې پیاوړې کېږي او دا هر څه تاسې ته خوشالي او خوښي درکوي.
۷ـ د ژوند مانا پیدا کړئ!
ژوند یوازې ډېرې پیسې او پرله پسې بریاوې نه دي، ژوند یو لوی نوم دی او تاسې د دې لوی نوم په اصلي مانا ځان پوه کړئ.
ځان ته واضح او سترې موخې وټاکئ. د ژوند اصلي خوښي په خپلو اهدافو پسې منډې وهل دي او همدا منډې وهل تر بل هر څه ډېر خوند او خوښي درکوي.
مینهوال کولای شي یاد کتاب له اکسوس او د ښار له نورو لویو کتابپلورنځيو په مناسب قېمت تر لاسه کړي.
