د روغتیا نړیوال سازمان: د شتمنو هېوادونو بې عدالتي به د بشري ناورین سبب شي

د ملګرو ملتونو د روغتیا نړیوال سازمان د کرونا واکسین د وېش پر بهیر نیوکه کړې ده. ددغه سازمان مشر تدروس ادهانوم په یوه خبري کنفرانس کې ویلي چې په نړۍ کې د شتمنو هېوادونو بې عدالتۍ او اخلاقي ماتې به د بشري ناورین سبب شي. دده په وینا د نړۍ شتمنو هېوادونو لسګونه میلیونه واکسین اخیستي دي په داسې حال کې چې بېوزله هېوادونه هېڅ نه لري. هغه وایي په ډېرو هېوادونو کې ډېر عمر لرونکي کسان واکسینو ته اړتیا لري خو په شتمنو هېوادونو کې ان پر ځوانانو واکسین وېشل کېږي. هغه د نړۍ پر شتمنو هېوادونو غږ کړی چې له بې عدالتۍ لاس په سر شي او په ټوله نړۍ کې واکسین لومړی هغه چا ته ورسوي چې دوی اړتیا ورته لري او ددې ویروس پر وړاندې یې بدن کمزوری دی. دمګړی امریکا، هند، روسیه او چین هغه هېوادونه دي چې واکسین یې بریالي راوتلي او ټولو لومړی پر کورني ویش ټینګار کړی دی.