د زونونو په کچه د میرویس نیکه کرکټ درې ورځېنۍ سیالۍ پيل شوې

د افغانستان کرکټ بورډ وايي، چې د کورني کرکټ په جوړښت کې د زونونو په کچه د میرویس نیکه تر نامه لاندې درې ورځنۍ سیالۍ نن د ننګرهار ولایت په دوو کرکټ لوبغالو کې پیل شوې. کرکټ بورډ ويلي، چې دغه سیالۍ نن د یو شمېر مسوولینو په شتون کې پیل شوې، چې لومړۍ ورځ به د غازي امان الله خان کرکټ لوبغالي کې د بست زون لوبډله د بند امیر زون له لوبډلې سره او دغه راز به د نجیب الله تره کي کرکټ لوبغالي کې د سپین غر زون لوبډله د مس عینک زون لوبډلې پر وړاندې د سیالۍ ډګر ته ښکته شي. خبرپاڼه کې راغلي، چې دغه سیالۍ به د راتلونکې جون میاشتې تر ۲۰مې نېټې دوام وکړي.