د قطر په دوحه کې د دواړو لوریو تر منځ د خبرو له پیله یوه میاشت تېره شوې، خو تر اوسه مرکچي پلاوي نه دي توانېدلي چې د مذاکراتو لپاره پر یوه طرزالعمل هوکړې ته سره ورسېږي.
د افغان ولسمشر دویم مرستیال سرور دانش وايي، طالبانو په قطر کې د سولې روانې خبرې په ټپه ولاړ حالت ته رسولې دي. نوموړي وړمه ورځ د افغانستان لویه څارنوالۍ کې د خبرو پر مهال وویل، طالبانو د مذاکراتو په طرزالعمل کې د ځینو بې ځایه موضوعات پر سر ټینګار سره د سولې خبرو بهیر په ټپه درولی دی.
بل لور ته وسله وال طالبان بیا پر افغان حکومتي مشرانو تور پورې کوي، چې په لوی لاس د خبرو پر وړاندې خنډونه راپورته کوي.
د طالبانو یوه ویاند ذبیح الله مجاهد له بي بي سي سره خبرو کې تور پورې کړ، چې د افغان حکومت مشران وخت ناوخت د سولې پروسې پر وړاندې خنډونه رامنځ ته کوي. ښاغلی مجاهد وایي: «دوی کوښښ کوي چې له دې خبرو سره بې باوري رامنځ ته کړي، ستونزې ایجاد کړي او دا ټول په دې مانا دي، چې دوی د سولې مخالف دي او نه غواړي چې دا بهیر پایله ولري یا مخکې لاړ شي.»
د قطر په دوحه کې د دواړو لوریو تر منځ د خبرو له پیله یوه میاشت تېره شوې، خو تر اوسه مرکچي پلاوي نه دي توانېدلي چې د مذاکراتو لپاره پر یوه طرزالعمل هوکړې ته سره ورسېږي.
د افغان دولت مرکچي پلاوی وایي، طالبان ټینګار کوي چې یوازې حنفي فقه او د طالبانو او امریکا تر منځ هوکړه باید د اختلافونو د حل بنسټونه وي، خو دولتي پلاوی غواړي چې جعفري فقه او د دولت او امریکا ګډه اعلامیه هم باید په پام کې ونیول شي.
څو ورځې وړاندې د افغان دولت مرکچي پلاوي وویل، دوی د دې ستونزې د حل لپاره بدیلې تګلارې هم وړاندیز کړې دي، خو طالبان لا هم پر خپله غوښتنه ټینګار کوي.
ښاغلي دانش د افغان دولت مرکچي پلاوی د یوې بلې برترۍ په توګه یاد کړ، ځکه په وینا یې، له بېلابېلو ګوندونو، قومونو، دیني عالمانو، پوهنتون استادانو، ښځو او نارینه وو تشکیل شوی دی.
د ولسمشر غني دویم مرستیال سرور دانش وویل، دولت طالبانو ته د اختلاف حل په لړ کې د قرآن، سنت او شریعت وړاندیز کړی، خو طالبان لا هم له امریکا سره پر خپله هوکړه ټینګار کوي.
ښاغلي دانش وايي: «طالبان د واک تر لاسه کولو لپاره اوس شریعت هم له پامه غورځوي، چې تل یې شعار و. طالبان خلکو ته د تبعیض له نظره ګوري، چې له دیني اصولو، د هېوادوالۍ او ملي ارزښتونو صریح مخالفت دی. دا له ښځو، د اسلامي مذاهبو له منونکو او لږکیو پر وړاندې ښکاره تبعیض دی.»
خو د طالبانو ویاند ذبیح الله مجاهد د ښاغلي دانش د دې څرګندونو په ځواب کې بي بي سي ته وویل: «بې له شکه چې د اسلامي امارت د جهاد دوام د امریکايي اشغال د خاتمې لپاره و او دی، دا سمه ده چې بهرني ځواکونه د تړون له مخې له افغانستانه وځي، ولې د اسلام حاکمیت زموږ ارمان او هدف دی او ترڅو چې دا هدف لاس ته نه وي راغلی، ټول مجاهدین جهاد ته ژمن دي او د دې لوړ هدف د تر لاسه کولو لپاره جهاد مشروع دی.»
تاوتریخوالی د چا لخوا ډېر شوی؟
افغان دولت تور پورې کوي چې طالبانو د سولې خبرو له پیل سره سم جګړې ته زور ورکړی او دولتي ځواکونه یوازې په دفاعي حالت کې دي، خو طالبان دا ادعا ردوي.
ذبیح الله مجاهد وايي، دوی په لویو ښارونو کې بریدونه نه کوي، د سیمو او پوځي مرکزونو نیولو هڅه نه کوي. نوموړي پر حکومتي مشرانو تور پورې کړ، چې له دوی د سیمو نیولو لپاره یې عملیات پیل کړي دي.
د وږي میاشتې په ۲۲مه د افغان دولت او طالبانو تر منځ د قطر پلازمېنه دوحه کې خبرې پیل شوې، چې په پرانیستغونډه کې یې د امریکا د بهرنیو چارو وزیر مایک پامپیو تر څنګ، ځینو افغان چارواکو هم برخه درلوده.
بي بي سي پښتو
