د جون له ۱۹مې څخه د جولای تر ۱۴مې پورې د ملګرو ملتونو د بشري حقونو شورا ۵۳مه غونډه په ژنيو کې جوړه شوه. په داسې حال کې چې تر کرونا وبا وروسته د نړیوال اقتصاد د بيا سمسورتيا بهیر ورو شوی او نړیوالې ننګونې مخ په زیاتېدو دي ، د ملګرو ملتونو د بشري حقونو شورا د بشري حقونو د ستونزو په هوارولو کې نړيوالو ته لارښوونه کړې ده.
په دې غونډې کې د چين پلاوي د بېلا بېلو موضوعاتو په باب بحث وکړ او د پرمختيايي هېوادونو د ګډو ګټو په اړه يې خپل دريځ او وړانديزونه بيان کړل. چين د عدالت د ساتلو لپاره ډېرې هڅې کړې او کارونو يې ښې پایلې تر لاسه کړي دي.
په ژنيو کې د ملګرو ملتونو په دفتر او د سويس په نورو نړيوالو سازمانونو کې د چين دايمي استازي چن شيو د چین ميډيا ګروپ له خبريال سره د مرکې په ترڅ کې وویل، چې په دې غونډې کې د چين استازو د ويناوو او د وړاندیزونو له لارې د مساواتو او متقابل درناوي پر بنسټ د بېلا بېلو خواوو د ګډو نظريو د راټولولو لپاره هڅې وکړې او د بشري حقونو د سیاسي کېدو پر مخنیوي يې ټینګار وکړ، تر څو د بشري حقونو چارې په سالمه توګه روانې شي.
هغه وويل، په برياليتوب سره مو له ټولو بشري حقونو څخه د انسانانو د برخمنولو لپاره د اقتصادي پرمختګ د پرمخبيولو په اړه يو لړ وړانديزونه وکړل، تر کرونا وبا وروسته اقتصادي سمسورتيا ته مو پاملرنه وکړه او له بشري حقونو د بېلا بېلو هېوادونو د خلکو د برخمنولو لپاره مو هلې ځلې وکړې، تر څو د اقتصادي سمسورتيا په بهير کې له ننګونو سره د مختلفو هېوادونو د مقابلې توان پياوړی شي. ده زیاته کړه، چې څه باندې شپېتو هېوادونو په دې غونډې کې له چين سره ګډ وړانديز وکړ. له دې څخه هم ښکاري، چې زمونږ وړانديز او لايحه د پراخو غړو هېوادونو له ګډو هيلو سره سمون لري.
د جولای په څوارلسمه د ملګرو ملتونو د بشري حقونو شورا په ۵۳مه غونډه کې له ټولو بشري حقونو څخه د انسانانو د برخمنولو لپاره د پرمختګ د خدمتونو په هکله د چین له خوا وړاندې شوې مسوده تصویب شوه. د پاکستان، عربي متحده اماراتو، سوډان او هندوراس په شمول د يو شمېر هېوادونو استازو په خپلو خبرو کې دغه مسوده وستايله او د چين له لارښوونکي رول څخه يې مننه وکړه. هغوی همدارنګه ويلي، چې د دغې مسودې له تصويبېدو څخه د پرمختيایي هېوادونو غوښتنه او ګډه هيله ښکاريږي.
د چين استازي چن شيو همداراز وويل، چې د چین پلاوي په جلا جلا توګه د زړو ښځو د حقونو او د مصنوعي ځيرکتیا له لارې د معلولينو حقونو د تامين په هکله وينا وکړه او نظرونه يې د بېلا بېلو خواوو د استازو له خوا تائيد شول، د بېلګې په توګه د چين پلاوي د مصنوعي ځيرکتيا له لارې د معلولينو د حقونو د پرمخبېولو په هکله نظر وښود او د امريکا، يونان او اطريش په شمول څه باندې اويا غربي هېوادونو له دغه نظر سره موافقه وکړه، چې همدې د بېلابېلو هېوادونو ترمنځ د راتلونکو همکاريو لپاره ښه زمينه برابره کړې ده.
د چین استازي چی شيو په خپلو خبرو کې په اشارې ويلي، چې د چين استازو په دې غونډې کې د نړيوال عدالت پر ساتلو ټينګار وکړ او بشري حقونو ته يې د سياسي رنګ له ورکولو سره مخالفت څرګند کړ. هغه وويل، چې ځينو هېوادونو د بشري حقونو په پلمه پر پرمختیایي هېوادونو تورونه لګولي او په دې اړه مو خپل نظر څرګند کړ او د امريکا په مشرۍ مو د غربي هېوادونو رياکارانه څېره افشا کړه.
د چين استازو د بشري حقونو شورا په دې غونډې کې پر امريکا غږ کړی، چې پر ونزويلا يواړخيز بنديزونه لېری کړي او د سوريې په دننه کې له بريټانيا سره غير قانوني ګډ پوځي عمليات بند کړي. دغه راز يې سمندر ته د جاپان د اټومي ککړو اوبو له خوشي کولو او د بهرنيو مهاجرينو پر حقونو د بريټانوي حکومت له تېري سره مخالفت څرګند کړی او له اسلامي هېوادونو يې غوښتي چې د ځينو لوېدېځو هېوادونو له خوا د قران کريم د سوځېدو په هکله بېړنۍ مباحثوي غونډه جوړه کړي، او له نړيوالو څخه يې هم غوښتي چې د نړيوال تمدن وړانديز عملي او د نړيوالو تمدنونو د تنوع ګډه ستانه وکړي.
