د ولسي جرګې غړي: حکومت دې ژر تر ژره د موټر چلوونکو ستونزه حل کړي

د ولسي جرګې غړي وایي حکومت دې د لویو لارو د موټر چلوونکو ستونزه حل کړي. د ولسي جرګې ګڼو غړو د نننۍ غونډې په امتیازي ساعت کې د خبرو پر مهال وویل چې پر لویو لارو جوړې شوې پوستې او امنیتي کسان له موټر چلوونکو په زور پیسې اخلي، دوی بې عزته کوي، وهي یې، بندي کوي یې او ظلمونه ورسره کوي. د وکیلانو په خبره د ډېری پوستو پولیس ددې پر ځای چې د موټرونو او خلکو امنیت تامین کړي په غلاوو او چور لګیا دي او حکومت باید دا ستونزه په بنسټیزه توګه حل کړي. د ولسي جرګې غړو وویل چې موټر چلوونکو له لسو ورځو راهیسې اعتصاب او اعتراض کړی دی خو حکومت یې غږ نه اوري او د حکومت دا ډول بې پروايي د منلو نه ده. د لویو لارو موټر چلوونکو له شاوخوا لسو ورځو راهیسې د هېواد په بېلو ولایتونو کې د غیر قانوني اخاذیو او پولیسو د فساد پر وړاندې اعتراض کړی دی او وایي چې پر لویو لارو د حکومت پوستې او پولیس یې ځوروي، پیسې ترې اخلي، شکنجه کوي یې او ان موټرونه یې په ګولیو ولي. دوی له حکومت له قانوني لارو د خپلو ستونزو د حل غوښتنه کوي.