ټرانسپورټ د توليدي ځواک د پياوړتيا مهم خوځنده قوت دی او د لوړ مؤثريت، چاپېريال ساتنې او ټيټ کاربن خپرونکي ډوله ټرانسپورټ د اقتصاد او ټولنې د باکيفيته پرمختګ لپاره ډېر ګټور دی.
د ۲۰۲۴م کال د دواملرونکي ټرانسسپورټ نړيوال فورم د سپتمبر له ۲۵مې نېټې څخه تر ۲۶مې پورې د چين په پلازمېنې بېجينګ کې ترسره شو او ګډونوالو يې له نړيوالې ټولنې څخه غوښتي، چې په ټرانسپورټي برخه کې همکارۍ پياوړې کړي او د ټرانسپورټ د دوامدار پرمختګ نقشه او لار دې وپنځوي.
د ملګرو ملتونو مرستيال سرمنشي لي جون هوا نوموړي فورم ته په وينال کې ويلي، چې په نړۍ کې د فوسيل موادو د سوځولو له امله د رامنځته شوي کاربن دوه اکسايډ په عمومي حجم کې د ټرانسپورټ ونډه يو په څلورمه ده.
نوموړي ويلي، نړۍ لا پاک ټرانسپورټي سيسټم ته اړتيا لري، خو د مالونو د ليږ راليږد سيسټم د پېچلې کچې او سربيې په برخو کې د پرمختللو او پرمختيايي هېوادونو ترمنځ لوی توپيرونه موجود دي.
نړۍ دواملرونکي ټرانسپورټي سيسټم ته اړتيا لري، څو پرمختګ او تګ راتګ يې پياوړی او د بېلا بېلو هېوادونو او سيمو د پرمختګ لپاره بېوزلي له منځه يوسي او نابرابرۍ ته د پای ټکی کېږدي.
د نوې انرژۍ د پرمختګ هڅونه د نړيوال ټرانسپورټ په زرغونو اصلاحاتو کې مهمه چاره ده.
د نيپال مرستيال صدراعظم او ماليې وزير بيشنو پراسد پاوډيل یاد فورم ته په وينا کې ويلي، چې هېواد ته یې په وارداتي موټرونو کې د برېښنايي موټرونو ونډه ۷۵ سلنه ده او د پخوا په پرتله څرګند زياتوالی ښيي او پنځه کاله مخکې دغه ونډه له ۱۰سلنې څخه هم کمه وه. د نوموړي په اند، دغه بدلون د ټرانسپورټ د سمون او نوښتي ټېکنالوژۍ په برخه کې د نيپال ظرفیت ښودلی دی.
بیشنو پراسد زياته کړې، چې دوامدار پرمختګ بايد د بنسټيزو تاسيساتو په ابادۍ کې لومړيتوب ولري. د ټرانسپورټ زرغونه بڼه د کاربن ايستنه کمه کولی او د راتلونکو نسلونو لپاره ښه چاپېريال په مېراث پرېښودلی شي.
د ټرانسپورټ دوامدار پرمختګ بايد ډاډمن او انعطاف منونکی وي.
په چين کې د روغتيا نړيوال سازمان استازي مارټين ټېلر دغه فورم ته په وينا کې ويلي، چې د زياتو هېوادونو په کليوالو سيمو کې د ميليونو ټرافيکي پېښو له امله ګڼو خلکو ژوند له لاسه ورکړی او ځايي بنسټيزو تاسيساتو او خدمتونو ته یې باید ځانګړې پاملرنه وشي.
نوموړی په دې نظر دی، چې د برابرۍ، ګډو ګټو او دواملرونکي پرمختګ ټرانسپورټي سيسټم په تاسيس کې بايد امنيت ته لومړيتوب ورکړل شي او ټولنيز، سوداګريز او نړيوال سازمانونه بايد د ظرفيت د لوړوالي او د بنسټيزو تاسيساتو د ابادۍ په برخو کې د حکومتونو ملاتړ وکړي او حکومتونه بايد اړوندې تګلارې خپرې او پلې کړي.
چين د ملګرو ملتونو د دواملرونکي پرمختګ د موخې په هڅولو کې لارښوونکی رول لوبوي او د دغې موخې د پوره کولو په بهير کې ټرانسپورټي رول ته په درنه سترګه ګوري.
د چين ټرانسپورټ وزير لي شياو پنګ ياد فورم ته په وينا کې ويلي، چې په تېر يو کال کې د دغه هېواد د ټرانسپورټي بنسټيزو تاسيساتو شبکه نوره هم بشپړه شوې، د نوښت ظرفيت یې پياوړی شوی او د ټرانسپورټي چارو د ادارې کچه او د ټرانسپورټي خدمتونو توان يې څرګند لوړ شوی دی. بر سېر پر دې، چين د خپل پرمختګ د موندلو تر څنګ ورخلاصون او نړيوالې همکارۍ هم پياوړې کړې دي.
د کاسپيان سمندر نړيوال ټرانسپورټي دهليز، د قراقرم سړک، د چين، ازبکستان او قرغېزستان اوسپنيزه لار او ورته نورې پروژې د دې ښکارندويي کوي، چې دغه هېواد له تېرو څو کلونو راهيسې په ټرانسپورټي برخه کې له زياتو هېوادونو سره همکارۍ کړي او د پام وړ برياليتوبونه يې ترلاسه کړي دي.
د ازبکستان ټرانسپورټ وزير محکاموف هم په دغه فورم کې ګډون او وينا کړې ده.
نوموړي ويلي، هېواد یې غواړي د تګ راتګ له لارې متقابل تفاهم پياوړی کړي او د ټرانسپورټي بنسټيزو تاسيساتو د ابادۍ او د نړيوال ځمکني ټرانسپورټ په برخو کې همکارۍ ژورې کړي.
