د چين دولت رئيس شي جين پینګ د روان کال د سپتمبر له لومړۍ نېټې څخه تر دويمې نېټې پورې له مصر څخه رسمي ليدنه وکړه. د دې هېواد بېلا بېلو ټولنو د دې ليدنې لوړه ارزونه کړې او ويلي يې دي چې دا يو تاريخي اهميت لرونکی رسمي ملاقات وو او همدا د مصر او چين ترمنځ د عنعنوي دوستۍ لپاره د نوې زمانې اهميت لري، چې له امله به يې دواړه هېوادونه په لاپراخه همکاريزه لار کې ګامونه پورته کړي.
د دواړو هېوادونو مشرانو د دې ليدنې په موده کې خبرې وکړې او ډېرو ګډو نظريو ته رسېدلي دي. رئيس شي جين پینګ پکې د چين او مصر د ګډ برخليک ټولنې د ابادۍ د پرمخ بېولو لپاره پنځه فقره ييزې نظريې وړاندې کړې او د مصر هېواد ولسمشر عبدالفتاح السيسي ويلي چې هېواد يې له چين سره د هر اړخيزو ستراتيژيکو همکاريو د اړيکو د نوي پرمختګ لپاره هڅه کوي.
له لسو کلونو وروسته رئيس شي جین پینګ بيا مصر ته رسمي سفر کړی او هممهاله د چين او مصر ترمنځ د ديپلوماتيکو اړیکو د ټينګېدو له اويايمې کليزې سره برابر دی، نو دغه سفر د دغو اړيکو د راتلونکي نوي پرمختګ لپاره ځانګړی اهميت لري. مصر د چينايي مېلمنو د هرکلي لپاره شانداره مراسم برابر کړي او ولسمشر السيسي له رئيس شي جين پینګ سره په ليدنه کې نوموړی ښه دوست بللی، چې دا هم د دواړو هېوادونو د مشرانو ترمنځ د ژورې دوستۍ ښکارندویي کوي. دواړو مشرانو د چين او مصر ترمنځ د هر اړخیزو ستراتيژیکو همکاريو د اړيکو پرمختیايي نقشه جوړه کړې او په ګډه يې د کمربند او لارې، مصنوعي ځيرکتيا، اقتصاد او سوداګرۍ، توليدي او اکمالاتي ځنځیرونو د همکاريو په شمول ډېرو برخو کې همکاريز سندونه لاسليک کړي دي. د دې ترڅنګ هغوی هم د دغو اړيکو د لا ټينګښت په هکله ګډه اعلاميه خپره کړه چې په دې سفر کې د ډېرو لاسته راوړنو لرل د دوه اړخيزو اړيکو د پرمختګ لپاره د څلې اهميت لري.
د چين د ټولنيزو علومو اکاډمۍ د لوېديځې اسيا او افريقا په اړه د څېړنيز انسټيټيوټ مرستیال تانګ جي چاو د سي اېم جي له خبريال سره په مرکه کې ويلي چې دغه سفر نه یوازې د چين او مصر ترمنځ د راتلونکو اړيکو لپاره لار روښانه کړې او هم د دواړو هېوادونو، د چین او عربي هېوادونو او د چين او افريقا ترمنځ د عنعنوي دوستۍ دوام هم بلل کېږي، چې دا به په نړۍ کې د سراسري جنوب د هېوادونو ترمنځ يووالي او همکارۍ ته حیاتي ځواک ورکړي. د عرب ليګ د دارالانشاء د معلوماتو، سندونو او د ژباړنې چارو رياست مشر هارلي جاد ويلي چې مصر ته د رئيس شي جين پینګ دغه سفر د دې ښکارندويي کوي چې چين له مصر، عربي هېوادونو او افريقا سره د اړيکو له پرمختګ څخه ټينګ ملاتړ کوي او همدا د سيمې او نړۍ د امنيت او پرمختګ لپاره ډېره مهمه چاره ده.
مصر هغه عربي او افريقايي هېواد دی چې وختي يې له اوسني نوي چين سره ديپلوماتيکې اړيکې ټينګې کړې، او لومړی عربي هېواد دی چې د ګډ برخليک ټولنې د ابادۍ موخه يې د دوه اړخيزو اړيکو په ګډه اعلاميه کې شامله کړې، او هم لومړی داسې پرمختیايي هېواد دی چې له چین سره يې ستراتيژيکې اړيکې ټينګې کړې دي. له اوياوو کلونو راهيسې که نړيوال او سيمه وضعيت هر څومره بدل شوی، خو د چين او مصر ترمنځ اړيکې تل پر خپل سم لوري روانې شوې او حياتي ځواک يې هم ډېر شوی چې د پرمختیايي هېوادونو د دوستانه چلند، يووالي او همکارۍ نمونه هم ګرځېدلې ده.
رئیس شي جين پینګ په دې سفر کې د چین او مصر ترمنځ د اړيکو په هکله پنځه فقره ييزې نظريې وړاندې کړې چې دواړه هېوادونه بايد يو له بل څخه ټينګ ملاتړ وکړي، د ګډو ګټو پربنسټ دې خپلمنځي همکارۍ لا پياوړې کړي، کلتوري تبادلې دې پرمخ یوسي، په امنيتي چارو کې دې دوه اړخيزې همکارۍ او په نړيوالو چارو کې دې څو اړخیزې همکارۍ لا پياوړې کړي. دغه نظريې د دغو اړيکو د راتلونکي پرمختګ لپاره لار روښانه کړې ده. د مصر د الاهرام ورځپاڼې ويبسايټ د سپتمبر په دويمه نېټه په خپله مقاله کې ليکلي چې مصر د يوه پرمختیايي هېواد په توګه بايد د اقتصادي سمسورتيا د موندلو لپاره له بېلا بېلو خواوو سره همکارۍ لا پياوړې کړي او په دې برخه کې له چين سره د اړيکو پرمختګ په اوس کې مهم ټکی دی.
اويا کلونه تېر شوي دي. اوس د چين او مصر ترمنځ اړيکې نوي پيل کې ولاړې دي. دواړه هېوادونه به په راتلونکي کې د دوستۍ د لاټينګښت، د ګډ پرمختګ او د تمدني تبادلې د لا پیاوړتیا نمونه وګرځي او د عدالت د ساتنې او د چين او عربي هېوادونو او د چين او افريقا ترمنځ د همکاريو د لاپياوړتيا د لارښوونکو په توګه به د دواړو هېوادونو د ګډ برخليک ټولنې د ابادۍ لپاره ګډې هڅې وکړي، ترڅو متزلزلې نړۍ ته ثبات او حیاتي ځواک ورکړي.
