د چین د کمونېست ګوند د مرکزي کمېټې د سياسي بيورو غړي او خارجه وزير وانګ يي د مارچ په لسمې نېټې له پاکستاني سيال اسحاق ډار سره تليفوني خبرې کړې دي.
اسحاق ډار په دې خبرو کې د ايران د اوسني وضعيت په اړه د پاکستان دريځ بيان کړی او له بېلا بېلو خواوو يې غوښتي چې له زغم کار واخلي او په سوله ييزو مذاکراتو روان بحران حل کړي. هغه د وضعيت د ارامولو لپاره د چين هڅې د قدردانۍ وړ بللي او نيت يې ښودلی، چې له چين سره په ملګرو ملتونو او نورو پلېټفورمونو کې همغږي او همکارۍ پياوړې کړي او د سولې د رامنځته کولو اغېزمنه لار ورسره په ګډه ومومي.
وانګ يي له ډار سره په خبرو کې ويلي، چين او پاکستان د ټولو فصلونو د ستراتېژيکو همکارانو په توګه د مهمو نړیوالو او سيمه يیزو مسئلو په اړه د تماس او همغږۍ ښه دود لري. دواړو خواوو په لومړي وخت د ايران د وضعيت په اړه دريځ څرګند کړی، چې همدا يې د مسئولانه رویې او د ملګرو ملتونو د منشور د اصولو د رعایت ښکارندويي کوي او په خبره یې، دغه جګړه حقه او مشروعیت نه لري او دوام به يې یوازې تلفات ولري.
نوموړي د وضعيت د خرابېدو د مخنيوي اصلي لار د امريکا او اسرائیل د پوځي عملياتو درول ياد کړي او ويلي يې دي چې چين پر خليجي هېوادونو بريدونه هم ناسم بولي او ټول هغه عملیات غندي چې ملي تاسيسات او بې ګناه ملي وګړي پکې په نښه کېږي.
وانګ يي زياته کړې، چين د سيمې د وضعيت د ارامولو لپاره د پاکستان منځګړيتوب د قدردانۍ وړ بولي او غواړي څواړخيزې همغږۍ او همکارۍ ورسره وساتي، له رغنده رول څخه يې ملاتړ وکړي او د سيمې د سولې او امن د ژر اعادې لپاره ورسره ګډ کار وکړي.
دواړو خواوو همدارنګه د پاکستان او افغانستان په سرحدي سيمو کې د تاوتريخوالي په اړه هم نظرونه تبادله کړي دي. وانګ يي ويلي، د افغانستان لپاره د چين د بهرنيو چارو وزارت ځانګړی استازی د سولې خبرو د هڅولو لپاره افغانستان او پاکستان ته په سفر وتلی دی. د دواړو هېوادونو ترمنځ اوسنی بېړنی کار دا دی، چې د جګړې د لمنې د پراخېدو مخه ونیول شي او دواړه خواوې د مذاکراتو مېز ته ستنې شي.
وانګ يي زياته کړه، چې چين د ترهګرۍ ضد د پاکستان له مبارزې څخه ټينګ ملاتړ کوي.
