د اسيايي پيلونو يوه ډله پدې وروستيو کې د چين د جنوب لوېديځ يون نان ولایت په شي شوانګ باننا استوګنيځي سیمې کې راڅرګنده شوې ده. د پيلونو دغې ډلې، چې شمېر یې ۴۲ ښودل شوی، د سیمې په لارو کوڅو کې ازاد چکر وهلی او لوبې او مستۍ يې کړي او په اخر کې د پوليسو او طبيعت ساتونکو په بدرګې د پيلونو د ساتلو ځانګړي زون ته ستانه کړای شوي دي.
درې کاله وړاندې ۱۵ پيلونه له همدې ځایه د چين شمال ته تللي وو او څلور مياشتې يې له خپل ساتونکي ځانګړي زون څخه بهر سفر کړی و او په پای کې د انسانانو په مرستې او لارښوونې بېرته خپل زون ته ستانه شول او اړوندو راپورونو يې پر ټولنيزو رسنيو د ډېرو خلکو پاملرنه راجلب کړې وه.
ځينو خلکو ته ښايي دا پوښتنه پيدا شي، که پيلونه د ځايي بزګرانو فصلونه وخوري، نو تاوان به یې څوک ورکوي؟
د چين يون نان ولایتي حکومت خلکو ته د وحشي حيواناتو لخوا د رسېدونکو زيانونو د جبران بيمې مقررات خپاره کړي او دغه چاره يې په ۲۰۲۳م کال کې د پوپنا کېدونکو وحشي حيواناتو او نباتاتو د نړيوالې سوداګرۍ تړون د سکرتريت لخوا د بشر او طبیعت ترمنځ د همغږۍ ساتلو په موخه د نمونوي اقدام په توګه بلل شوې ده.
دغه چاره د ايکولوژۍ د ساتلو په برخه کې د چين هڅې منعکسوي. يون نان ولایت په نړۍ کې له هغو سيمو څخه دی، چې بيولوژيکي تنوع يې ډېره غني او ځايي حکومت يې د ساتلو لپاره ډېرې هڅې کوي. د بېلګې په توګه په دغه ولایت کې د وحشي موجوداتو او د نباتاتو د تخمونو د ساتلو لپاره د اسيا تر ټولو لوی زېرمتون جوړ شوی او له ډېرو هېوادونو او نړيوالو ارګانونو سره يې د يادو تخمونو د زېرمو او څېړنو په اړه ګډې همکارۍ کړې دي. د دغه زېرمتون مسئول وايي، کارکوونکي يې په ډېر ټيټ حرارت کې د تخمونو د ساتلو تخنيکي څېړنو په هڅه کې دي، که هڅې يې بريالۍ شي، نو تخمونه به يې دايمي خوندي شي او دا به د نړۍ د بيولوژيکي تنوع د ساتلو لپاره لوی خدمت وي.
د چين حکومت ايکولوژۍ ته ډېره پاملرنه کوي. د دغه هېواد د واکمن کمونېست ګوند شلمې مرکزي کمېټې په خپلې درېيمې عمومي غونډې کې د ايکولوژيکي مدنيت د سيسټم د اصلاحاتو پلان جوړ کړی او د ايکولوژيکي چاپېريال د مديريت سیسټم او د بيولوژيکي تنوع د ساتلو د چارو د همغږۍ ميکانيزم د اصلاحاتو کارونو سپارښتنه يې کړې ده، چې په دې سره به په دغه هېواد کې توليدي ځواک پياوړی او وساتل شي.
د يون نان ولایت د شي شوانګ بان نان سيمې د داکالاو کلي بزګران د غره لمنې په ابادو ځمکو کې د ربړ او پوميلو(د سټروسو یو ډول دی) تر ونو لاندې د ادنوسما بوچنيرودیس (Adenosma buchneroides) په نوم نباتات کري، چې نه يوازې د ځکمو د استعمال کچه يې لوړه کړې، بلکې د ځانګړو نباتاتو د کرکيلې له لارې يې د شتمنۍ لار هم پراخه کړې ده.
ادنوسما بوچنيرودیس څخه ځانګړي تېل ايستل کيږي او د ماشو او مچيو د شړلو لپاره استعماليږي. په ۲۰۲۳م کال کې له دغه ډول نباتاتو څخه د تېلو رايستلو چارو ياد کلي ته ۷۵۰ زره یوانه عواید رسولي او دغه چارې يې په ۲۰۲۲م کال کې په کاناډا کې د بيولوژيکي تنوع تړون د لاسليک کوونکو د ۱۵ مې غونډې پر مهال د ګډونوالو لخوا هم ستايل شوې دي.
چين د ايکولوژيکي چاپېريال د ساتلو لپاره زرغون پرمختګ ته ډېره پاملرنه او هڅې کوي. د چين د کمونېست ګوند شلمې مرکزي کمېټې په خپلې درېيمې عمومي غونډې کې د زرغون پرمختګ او د کاربن کمولو ميکانیزم د اصلاح پلان جوړ کړی دی او د چين حکومت د جولای په پای کې د هېواد د اقتصادي او ټولنيز پرمختګ د چټک زرغونېدو نظرونه خپاره کړي او د زرغون پرمختګ جامع پلان يې جوړ کړی دی.
د يون نان ولایت په مرکز کون مينګ ښار کې د چاينا پیټرول ګروپ فرعي څانګې د پيټرول د توليد په پروسې کې رامنځته کېدونکې ککړې اوبه بيا چڼ او تصفيه کوي، چې ٪ ۸۰ ککړې اوبه يې له تصفيې وروسته پاکې او بيا استعمالیږي.
په ۲۰۲۳م کال کې په چين کې د کورنيو ناخالصو توليداتو لپاره د انرژۍ د استعمال او د کاربن ډای اوکسایډ د خپرېدو کچه د ۲۰۱۲م کال په پرتله ډېر کموالی ښيي او د روان کال د جون مياشتې ترپايه پورې په دغه هېواد کې د بيا پيدا کېدونکې انرژۍ نصب شوي ظرفيت د ټولې نصب شوې برېښنا د توليدي ظرفيت ٪ ۵۳.۸ جوړه کړې او پدې سره چين په نړۍ کې د زرغون پرمختګ لپاره مهم طاقت ګرځېدلی دی.
