د چين د سوداګرۍ وزارت وياند د مې په ۱۶مه نېټه د خبريال پوښتنې ته په ځواب کې له امريکا سره د خپل هېواد د اقتصادي او سوداګريزو سلا مشورو د ابتدايي لاسته راوړنو په اړه معلومات ورکړل.
دغه وياند وويل، د چين او امريکا اقتصادي او سوداګريزو پلاويو د مې په ۱۳مه نېټه په کوريا جمهوريت کې خپلمنځي سلا مشورې وکړې او په همدې چارو کې یې د دواړو مشرانو د کتنې لپاره تياريانې نيولې دي. دواړو خواوو د خپلمنځي سلا مشورو په ترڅ کې د مشرانو د مهمو ګډو نظريو په رڼا کې د متقابل درناوي، سوله ييز ګډ ژوند او ګټې- ګټې همکارۍ په اصولو د يو بل د پاملرنې وړ اقتصادي او سوداګريزو مسئلو او خپلمنځي واقعي همکارۍ د پرله پسې پراختيا په هکله د نظريو څرګندې، ژورې او رغنده تبادلې کړې او په پای کې یې ځينې مثبتې موافقې ترلاسه کړې دي.
۱- دواړه خواوې به پخوانۍ لاسته راوړنې بيا پلې کړي او د ګمرکي تعرفو د اړوندو ترتيباتو په اړه يووالي ته رسېدلې دي.
۲- دواړو خواوو موافقه کړې چې د سوداګرۍ او پانګونې په چارو کې د يو بل د پاملرنې وړ مسئلو په اړه د بحث کولو په پار د سوداګرۍ شورا او د پانګونې کمېټه جوړه شي.
۳- دواړه خواوې به د يو بل بازارونو ته د ځينو کرنيزو توکو د ننوتلو په برخه کې د شته ستونزو د لرې کولو هڅې وکړي.
۴- دواړو خواوو موافقه کړې چې د ګمرکي تعرفو په اړوندو ترتيباتو سره د کرنيزو توکو په شمول دوه اړخيزې سوداګرۍ پراخې کړي.
۵- دواړه خواوې د چين له خوا د امريکا پر الوتکو د پېرودلو او د امريکا لخوا د الوتکو انجن او پرزو د برابرولو د تضمين په اړه موافقې ته رسېدلې دي.
