د چين د دولت رئيس شي جین پينګ ځانګړي استازي او د دغه هېواد مرستيال دولت رئیس هان جنګ د جنورۍ په ۱۹ مه نېټه په وانشينګټن کې د امريکا او چین د سوداګرۍ شورا او د امريکا د سوداګرۍ ټولنې په شمول د صنعتي او سوداګريزو ټولنو له استازو سره وکتل.
هان جنګ له نوموړو استازو سره د کتنې پر مهال وويل، د چین دولت رئیس شي جين پينګ پدې وروستيو ورځو کې د امريکا له نوي ولسمشر ډونالډ ټرمپ سره مهمې تيلېفوني خبرې کړې او د دواړو هېوادونو ترمنځ د اړيکو په اړه مهمې موافقې ته رسېدلي دي. چين به پر اصلاحاتو او ورخلاصون ټينګار ولري، د خپل سوداګريز چاپيريال د ښه کولو هڅو ته به دوام ورکړي او هيله لري، چې امريکايي تصدۍ په چين کې پانګونې ته دوام ورکړي او د دواړو هېوادونو ترمنځ د اړيکو د ثابت، سالم او دواملرونکي پرمختګ لپاره لازیات خدمتونه وکړي.
د امريکا د صنعت او سوداګرۍ ټولنو استازو څرګنده کړې، چې د شي جین پينګ او ډونالډ ټرمپ ترمنځ وروستيو تيلېفوني خبرو نړۍ ته مثبت او هڅوونکی پيغام ورکړی دی. چين او امريکا د نړۍ تر ټولو حياتي ځواک لرونکي او په ساینس او اقتصاد په برخو کې پرمختللي هېوادونه دي او باید يو له بل سره ګټورې همکارۍ وکړي او د خپلمنځي اړيکو رغنده او ثابته لار پيدا کړي.
نوموړو همدارنګه د چين پر راتلونکي اقتصادي پرمختګ او پرمختيايي فرصتونو باور ښودلی او د دواړو هېوادونو ترمنځ د خبرو، دوه اړخيزو اړيکو، اقتصادي او سوداګريزو همکاريو څخه يې ملاتړ څرګند کړی دی.
د چین مرستيال دولت رئیس هان جنګ په همدې ورځ د امريکا د ټېسلا شرکت له اجرائيه رئيس ايلون ريف ماسک سره هم وکتل او په دې کتنه کې يې هيله ښودلې، چې د ټېسلا په ګډون امریکايي تصدۍ د چين په پرمختګ کې له نغښتو فرصتونو څخه ګټې پورته کړي او د دواړو هېوادونو ترمنځ د اقتصادي او سوداګريزو اړيکو لپاره لازيات خدمتونه وکړي.
ښاغلي ماسک وويل، چې شرکت يې غواړي له چين سره پانګيزې همکارۍ زياتې کړي او د دواړو هېوادونو ترمنځ د اقتصادي او سوداګريز تګ راتګ لپاره مثبت رول ولوبوي.
