د چين کمونېست ګوند د مرکزي کمېټې سياسي بيورو د ډسمبر په ۹مې نېټې په يوې غونډې کې د ۲۰۲۵م کال اقتصادي کارونه څېړلي، د ډيسپلين څار مرکزي کمېټې کاري راپور يې اورېدلی او په راتلونکي کال کې د ګوند دننه د فساد ضد کارونه يې ترتيب کړي دي.
د چين کمونېست ګوند د مرکزي کمېټې عمومي منشي شي جين پينګ د دغې غونډې مشري کړې ده.
په دغه غونډه کې روان کال د هېواد د اقتصادي او ټولنيز پرمختګ د ۱۴م پنځه کلن پلان د پوره کولو کليدي کال بلل شوی او پکې ويل شوي، چې سږ کال د ګوند مرکزي کمېټې د شي جين پينګ په مرکزيتوب د ټولو ګوندي غړو او د مختلفو قومونو د خلکو لارښوونه کړې، اقتصادي حالت يې ثابت ساتلی او پرمختګونه يې ورکړي دي. دغه راز په همدغه کال کې د هېواد اقتصاد، علم او ټکنالوژي او هراړخيز ملي ځواکونه پر له پسې پياوړي شوي، د نوي کيفيت توليدي ځواک ثابت پرمختګ کړی، اصلاحاتو او ورخلاصون ژورتيا پيدا کړې، په څو مهمو برخو کې ګواښونه منظم او اغېزمن ليري شوي، د خلکو ژوند تضمين شوی او د اقتصادي او ټولنيز پرمختګ عمده موخې او دندې په برياليتوب بشپړې شوې دي.
په ياده غونډه کې پر دې ټينګار شوی، چې ټول ګوندي غړي بايد د شي جين پينګ د نوې زمانې چيني ځانګړتيا لرونکو سوسياليستي افکارو په رڼا کې د راتلونکي کال د اقتصادي کارونو په پار د ګوند د ۲۰م ملي کانګرېس او د ۲۰مې مرکزي کمېټې د ۲مې او ۳مې غونډو روحيې پوره تطبيق کړي، کارونو ته باید ثابت پرمختګ ورکړي، نوې پرمختيايي نظريې باید په هراړخيزه او سمه توګه پلې کړي، نوی پرمختيايي چوکاټ باید په چټکۍ اباد او د باکيفيته پرمختګ ګامونه پورته کړي، د اصلاحاتو پوره ژورتيا باید ومومي، ځانونه باید د ورخلاصون لا لوړې سويې ته ورسوي، عصري صنعتي سيسټم باید اباد کړي، د پرمختګ او امنيت ترمنځ بېلانس باید وساتي، لا مثبتې او اغېزمنې عمومي تګلارې باید پلې او کورنۍ اړتياوې پراخې کړي، علمي، تخنيکي او صنعتي نوښتونو ته باید په ګډه پرمختګ ورکړي، د سهامي بازارونو ثبات باید وساتي، د ځينو مهمو ساحو او له بهره راغلي ګواښونه باید ليرې کړي، د خوځنده ځواک په پيدا کولو سره باید اقتصاد ته پر له پسې پرمختګ ورکړي، د خلکو ژوند سويه باید بيا لوړه کړي، ټولنيزه همغږي او ثبات باید وساتي، د هېواد د اقتصادي او ټولنيز پرمختګ ۱۴م پنځه کلن پلان موخې او دندې باید باکيفيته بشپړې کړي او د ۱۵م پنځه کلن پلان د پيل لپاره باید ښه بنسټ کېږدي.
په دغه غونډه کې دا هم ويل شوي، چې چين به په راتلونکي کال کې لا نورې مثبتې مالي او معقولې ناتړلې پولي تګلارې پلې کړي، د مصارفو زياتې هڅونې به وکړي او د پانګونې ګټې به زياتې او په هراړخيزه توګه به کورنۍ اړتياوې پراخې کړي.
د چين کمونېست ګوند به د اقتصادي کارونو پر لارښوونې ټينګار ولري، څو مختلفې تګلارې یې په عمل کې پلې شي.
وړاندې له دې، عمومي منشي شي جين پينګ د چين کمونېست ګوند د مرکزي کمېټې د سياسي بيورو د دايمي کمېسيون د يوې ناستې مشري کړې، چې په ترڅ کې يې د ډيسپلن څار مرکزي کمېټې د ۲۰۲۴م کال کاري حالت او د ډيسپلين څار د ۲۰مې مرکزي کمېټې د ۴مې عمومي غونډې د چمتوالي معلومات ترلاسه کړي دي.
په دغې غونډې کې پرېکړه شوې، چې د ۲۰۲۵م کال د جنورۍ له ۶مې تر ۸مې نېټې پورې به د ډيسپلين څار د ۲۰مې مرکزي کمېټې ۴مه عمومي غونډه تر سره شي.
