”د پراخې کچې نوښت“د داوس په سږني دوبنی فورم کې يو کليدي عبارت ګرځېدلی او په دغه برخه کې بیا چين تر ټولو ښه عملي ډګر بلل شوی دی.
د نړۍ د څه باندې ۹۰ هېوادونو او سيمو شاوخوا ۱۷۰۰ مېلمانه په دا ليان ښار کې د ۲۰۲۶ کال د داوس په دوبني فورم کې د ګډون په موخه راغونډ شوي وو او د جون له ۲۳مې نه تر ۲۵مې نېټې پورې يې ”د پراخې کچې نوښت“ په اړه بحثونه کړي او د علمي او تخنيکي نوښتونو او همکاريو نړيواله نقشه يې پنځولې ده.
په اوسنۍ نړۍ کې جيوپوليتيکي حالات خورا پېچلي ښکاري، نړيوال اقتصادي پرمختګ د خوځنده ځواک له کمښت سره مخ دی او ټکنالوژۍ د چټکو اصلاحاتو په حال کې دي. نو نړۍ څنګه د نړيوال اقتصاد د شاتګ د خطر او فشار پر وړاندې مقابله او د اقتصادي پرمختګ خوځنده ځواک پيدا کولی شي؟
د داوس په سږني دوبني فورم کې”د پراخې کچې نوښت“ په سرليک د نړيوال اقتصاد يوه مهمه پرمختيايي موضوع وړاندې شوې ده. په دغه درې ورځني فورم کې د مصنوعي ځيرکتيا، نوې انرژۍ، بيو درملو او کوانټوم ټیکنالوژۍ په شمول د مروجو او پرمختللو چارو کابو سل فعاليتونه ترسره شوي دي.
د چين صدراعظم لي چيانګ د دغه فورم پرانيستونکو مراسمو ته د وينا په ترڅ کې له نړۍ سره د چين نوښتي کيسې شريکې کړي او په نوښتونو د اقتصادي چارو پرمخبيول يې د چيني اقتصاد د دايمي او ثابت پرمختګ کليدي رمز بللی دی.
نوموړي ويلي، چين په علمي او تخنيکي ترقۍ او د صنعتي چارو په پرمختګ ټولې نړۍ ته مخ په زیاتېدونکې نوښتي ګټې برابرې کړې دي.
نړۍ له دغه فورم څخه دا روڼ پيغام ترلاسه کړی، چې چين له ټولو هېوادونو سره د نوښتي پرمختګ لا زيات فرصتونه شريکوي.
د پراخې کچې نوښت موخه په پراخه کچه کې د نويو ټکنالوژيو استفاده ده، چې د نوښتي ارزښتونو او اينجن د دوام مهم ملاتير بلل کېږي.
د نړيوال اقتصادي فورم اجرائيوي مشر ميرېک دوسېک پر دې اند دی، چې چين د پراخې کچې نوښتونو په برخه کې د ليدو وړ پرمختګونه موندلي، د نويو ټکنالوژيو په استفادې يې واقعي اقتصادي چارو ته وده ورکړې او صنعتي اصلاحات يې پرمخبېولي دي. د ده په خبره، نړۍ د چين د تجربو لېواله ده.
بشپړ صنعتي سيسټم، پراخ بازار او فعاله نوښتي فضا په چين کې د لوړې کچې نوښتونو د رامنځته کېدو بنسټ ايښی دی.
چين په لومړي ځل « د نړۍ د ۲۰۲۵ کال نوښتي شاخص راپور» کې د درجه بندۍ په مخکښو لسو ځايونو کې شامل شوی دی.
په ۲۰۲۵م کال کې د چين د مصنوعي ځيرکتيا تصديو شمېر له ۶۰۰۰ څخه اوښتی و او د اټکل له مخې د مرکزي پانګو پيمانه يې ښايي ۱.۲ ټريليونو يوانو ته رسېدلې وي.
د چين د ښارونو په مختلفو لارو او واټونو کې روان نوې انرژۍ کارېدونکي موټرونه او په فابريکو کې بېلا بېلې ځيرکې توليدي کرښې، چې پکې بې شمېره نوښتي لاسته راوړنې کارول شوي، په دغه هېواد کې د پراخې کچې د نوښتونو تر ټولو مستقيمه څرګندويي کوي.
د امريکا د هېرباليف شرکت د قانوني او عامه چارو مسؤل هېري وانګ سي اېم جي ته ويلي، چين خورا بشپړ صنعتي ځنځيرونه او فعال صنعتي سيسټم لري. څومره چې خلک له نوښتي ټکنالوژيو څخه ګټې پورته کوي، هومره د ټکنالوژيو پرمختګ چټکېږي.
ځيني لوېديځوال د چين پر چټکې تخنيکي ودې او صنعتي نوښتونو اندېښنه لري او د خپلې خوښې څرګندونې کوي. خو د دوی د نظرونو برعکس، په نړيواله ټولنه کې داسې اوازونه زيات اورېدل کېږي چې چين نړۍ ته د پخوا په پرتله ډېر زيات فرصتونه برابر کړي دي.
په تېرو څو کلونو کې مخ په زياتېدونکو نړيوالو شرکتونو په چين کې د څېړنې او پرمختګ مرکزونه او د سيمې مقرونه جوړ کړي دي.
په چين کې د امريکا د تېرمو فیشر سایسنټيفيک شرکت عمومي مدير ميګويل فاوستينو سي اېم جي ته ويلي، چې چين د څو کلونو په پرمختګ د نړۍ نوښتي اينجن ګرځېدلی او شرکت يې په نړيوال اقتصاد او علمي او تخنيکي سيسټم کې د چين په دايمي ارزښتونو خوشبينه رويه لري. د ده په خبره، شرکت به یې په راتلونکې کې چين کې لا زيات نوښتي چارې ترسره کړي.
