د جاپان لومړي وزیر فومیو کشدا د مې په ۷مه نېټه د کوریا جمهوریت پلازميني سيول ته ورسېد او له دغه هېواد څخه يې دوه ورځنۍ لیدنه پيل کړه. هغه په همدې ورځ د کوریا جمهوریت له ولسمشر یون سیوک یول سره خبرې اترې وکړې او موافقه يې وکړه چې د دواړو هېوادونو اړیکې دې ښې شي.
د کوریا جمهوریت څو غیرحکومتي سازمانونو د دغه هېواد د ولسمشرۍ ماڼۍ مخې ته احتجاج وکړ او پر فومیو کشدا يې غږ وکړ چې جاپان بايد د دویمې نړیوالې جګړې پر مهال پر کوریا جمهوریت د تېري له امله بښنه وغواړي.
اعتراض کوونکو دغه راز د کوریا جمهوریت، امریکا او جاپان د پوځي اتحاد د ړنګېدو غوښتنه هم وکړه.
فومیو کشدا لومړی د کوریا جمهوریت ملي مقبرې ته لاړ او دعا يې وکړه. دا له ۱۲ کلونو راهيسې لومړی ځل دی چې د جاپان لومړي وزیر د کوریا جمهوریت په ملي مقبره کې دعا کوي. د کوریا جمهوريت رسنیو ویلي، ترې د دواړو هېوادونو د اړیکو د ښه کېدو او د امنیتي چارو په برخه کې د خپلمنځي همکارۍ د پياوړتیا موخه ښکاري.
یون سیوک یول له فومیو کشدا سره د خبرو اترو په ترڅ کې وویل، اوس د کوریا جمهوریت او جاپان اړیکې د ښه والي تمایل لري. دواړو خواوو په تېر مارچ کې د کتنې په وخت کې موافقه کړې، چې دوه اړخیزې اړیکې به پیاوړې او بیا جوړې کړي او خپلمنځي ډیالوګ او همکارۍ به ژورې کړي. هغه زیاته کړه، له تېرو دوو میاشتو راهیسې د جاپان او کوریا جمهوریت د مختلفو کچو خبرې پيل شوې دي.
یون سیوک یول او فومیو کشدا تر خبرو اترو وروسته په یوه ګډه خبري ناسته کې ګډون کړی. یون سیوک یول په دې ناسته کې وویل، سمندر ته د جاپان د فوکوشیما اټومي ککړو اوبو د ایستلو مسئله ډېره د پاملرنې وړ ده. دواړو خواوو موافقه کړې چې کوریا جمهوریت به فوکوشیما ته د کارپوهانو پلاوی ولیږي. نوموړي هیله وښودله چې جاپان د کوریا جمهوریت د خلکو پر هغه غوښتنه غور وکړي چې پر علمي بنسټ عیني څار ترسره شي او اغېزناک تدبیرونه دې ونیسي.
فومیو کشدا د کوریا جمهوریت د خلکو د ډېرې پاملرنې وړ تاریخي مسئلې یعنې په دویمه نړیواله جګړه کې پر دغه هېواد د جاپان د تېري په هکله وویل، په تېر مارچ کې جاپان ته د ولسمشر یون سیوک یول د سفر په وخت کې مې په ډاګه کړې چې زه به د ۱۹۹۸م کال په اکتوبر کې د جاپان او کوریا جمهوریت د خپرې شوې ګډې اعلاميې په شمول د تاریخ په اړه د جاپان د پخوانیو کابینو دریځ ته دوام ورکړم او دغه دریځ به نه بدلېږي. د ولسمشر یون سیوک یول د پرېکړې له مخې، د کوریا جمهوریت حکومت سږ کال د مارچ په ۶مه نېټه د دوهمې نړیوالې جګړې پر مهال د جاپان لخوا مجبورو شویو کوریايي مزدورانو ته د تاوان ورکولو تدبیر اعلان وکړ، یعنې د کوریا جمهوریت د عامه ادارې او خوندیتوب وزارت مالي ګروپ د اړوندو جاپاني تصدیو پر ځای يادومزدورانو ته تاوان ورکړي. فومیو کشدا وویل، د کوریا ډېرو کسانو د درد او غم سره سره په مېړانه او زړور توب سره د ښې راتلونکې جوړولو لپاره ګامونه پورته کړل او دې عمل پر ما ډېره اغیزه کړې ده.
د کوریا جمهوریت رسنیو د لیکنو په خپرولو سره پر فومیو کشدا نیوکې کړې چې د دویمې نړیوالې جګړې پرمهال يې د جاپان له خوا پر کوریا جمهوریت د تېري له امله چې یوه تاریخي مسئله ده، په مستقیمه توګه بښنه نه ده غوښتې او د کوریا جمهوریت د خلکو د عامو افکارو د مخالفت آرامولو په پار يې یوازې شخصي احساسات څرګند کړل.
که څه هم د یون سیوک یول حکومت په دوامداره توګه د جاپان حکومت سره له مهربانۍ ډکه رویه څرګنده کړې، خو د کوریا جمهوریت څو غیرحکومتي سازمانونو په دې وروستیو کې د هېواد په ګوټ ګوټ کې مختلف احتجاجي فعالیتونه ترسره کړل. په تېره بیا د مې په ۷مې نېټې څو غیرحکومتي سازمانونو د ولسمشرۍ ماڼۍ مخې ته لاریونونه وکړل او و يې غوښتل چې د کوریا جمهوریت، جاپان او امریکا پوځي اتحاد باید ړنګ شي، د جاپان له ظلمونو ملاتړ باید پرې شي، جاپان باید پر کوریا جمهوریت د ناقانونه تېري له امله رسمي بښنه وغواړي. لاریون کوونکو سمندر ته د جاپان د فوکوشیما ذروي ککړو اوبو د ایستلو په اړه د جاپان له پلان سره سخت مخالفت څرګند کړی دی.
