رویټرز: د طا لبانو تر راتګ مخکې د ا. بانک ډالري ذخایر کم شوي وو

واک ته د طا لبانو تر رسېدو مخکې د افغانستان بانک ډالري ذخایر کم شوي وو. رویټرز د نړیوال بانک او د افغانستان بانک د نورو ډونرانو یوه راپور ته لاسرسی پیدا کړی، چې ښيي واک ته د طا لبانو تر رسېدو مخکې د افغانستان بانک ډالري ذخایر کم شوي او یوه اندازه پیسې یې لادرکه شوې هم دي. سرچینه وایي چې یاد بانک د طا لبانو تر راتګ مخکې شاوخوا یو میلیارد ډالر د اسعارو د تبادلې لپاره بازار ته وړاندې کړي او همدا راز یې د دغه بانک ولایتي څانګو ته هم د معمول پر خلاف میلیونونه ډالر لېږلي دي. سرچینه وایي چې ولایتي څانګو ته پخوا تر شل میلیونه ډالرو پورې لېږل کېدل چې دا ځل تر ۲۰۲ میلیونو ډالرو پورې لېږل شوي دي. رویټرز وایي چې په افغانستان کې د اوسني اقتصادي وضعیت او پیسو د نشتوالي عمده لامل د مرکزي بانک یادې کړنې، ناسم مدیریت او له دې بانک د پیسو ورکېدل دي. تر دې وړاندې بیا د ا.ا. ویاند ذبیح الله مجاهد هم ویلي وو چې د افغانستان له بانکونو د دوی تر راتګ مخکې میلیونونه ډالر ایستل شوي دي او دا ددې لامل شوی چې اوسنی بد اقتصادي وضعیت رامنځ ته شي.