زلینسکي روسي ځواکونه په نسل وژنه تورن کړي دي

د اوکراین ولسمشر ولادیمیر زلینسکي روسي ځواکونه په نسل وژنه تورن کړي دي او زیاته کړې یې ده چې د روسي ځواکونو کړنې د یو بشپړ ملت او خلکو له منځه وړل دي. نوموړي څرګنده کړې ده چې اوکراین کې تر سلو ډېر توکمونه ژوند کوي او د روسي ‌ځواکونو بریدونه د دغو ټولو توکمونو د له منځه وړلو په مانا دي. زلینسکي دا څرګندونې وروسته تر هغه کړې دي چې کې‌یف ته له څېرمه ښار بوچا څخه د روسي ځواکونو تر وتلو وروسته په سړکونو د لسګونو عامو وګړو مړي موندل شوي دي. یو شمېر مړي تر خاورو لاندې شوي دي او ډېری نور بیا په لارو کوڅو کې همداسې پرېښودل شوي دي.