عراقچي: له اروپایي ټولنې سره دښمني نه‌غواړو، خو د بندیزونو ځواب به ورکړو

د ایران د بهرنیو چارو وزیر سید عباس عراقچي د ایراني ډيپلوماتانو په اړه د اروپايي پارلمان د تازه بندیز په غبرګون کې ویلي چې ایران له اروپايي ټولنې سره د دوښمنۍ په لټه نه دی، خو هر ډول بندیز ته به یې ځواب ورکړل شي. عراقچي پر خپله اېکس پاڼه لیکلي چې په غزه کې څه باندې دوه کاله «نسل وژنه» روانه وه چې په خبره یې له ۷۰ زرو فلسطینیانو یې ژوند واخیست، اروپايي ټولنې د اسرائیلو پر وړاندې هېڅ ډول عملي ګام پورته نه کړ. دا څرګندونې وروسته له هغې کیږي چې اروپايي ټولنې اعلان وکړ، چې ټول ایراني ډیپلوماتان او استازي په بروکسل، سټراسبورګ او لوګزامبورګ کې د اروپايي پارلمان ودانیو ته له ننوتلو منع شوي دي.