فوټسال نړیوال جام؛ افغان لوبډله د ارجنټاین لوبډلې سره مخ کیږي

د فوټسال نړیوال جام سیالیو په لړ کې نن شپه د فوټسال ملي لوبډله د ارجنټاین لوبډلې پر وړاندې د لوبې ډګر ته ښکته کېږي. دغه سیالي نن شپه ۷:۳۰ بجې ترسره کیږي. افغان لوبډلې په خپله لومړۍ لوبه کې انګولا ته ۶ د ۴ په وړاندې ماتې ورکړې وه او سیاله ارجنټاین لوبډله هم د اوکراین په وړاندې ۷ – ۱ بریا لري. دا لومړی ځل دی چې افغانستان د فوټسال نړیوال جام ته لار موندلې او خپله لومړی لوبه یې ګټلې ده. له دې سترې بریا وروسته د هېواد په ګوټ‌ګوټ کې افغانانو خپله خوښي څرګنده کړه. افغانستان او اوکراین، دغه راز ارجنټاین او انګولا به د روانې وږي میاشتې په ۳۱مه نېټه د سیالۍ ډګر ته ووځي.