له منځني ختیځه د بریټانوي وګړو د تخلیې لپاره چمتووالی نیول شوی

پر اسراییل د ایران د برید د احتمال په ډېرېدو، د بریټانیا هوایي او سمندري ځواکونه له منځني ختیځه د دغه هېواد د وګړو د اېستلو لپاره چمتو شوي دي. ډېلي میل د برېتانیا د دفاع وزیر له خولې لیکلي، هېواد یې په سیمه کې د خپلو اوسېدونکو سره د مرستې لپاره چمتو دی. تر دې دمه جرمني، فرانسې، هند، روسیې، پولنډ او کاناډا له خپلو وګړو غوښتي، چې ایران، اسراییل او فلسطیني سیمو ته دې له سفره ډډه وکړي. ځینو دغو هېوادونو په اسراییل او ایران کې له خپلو اوسېدونکو غوښتي، چې دغه دواړه هېوادونه پرېږدي. امریکا هم له خپلو اوسېدونکو غوښتي، چې اسراییل ته سفر ونه‌کړي او د دغه هېواد کارکوونکي دې د اسراییل له لویو ښارونو تل اویو او ورشلېم څخه ووځي. له بل پلوه نېدرلنډ هم غواړي، په تهران کې خپل سفارت وتړي.