متحده عربي اماراتو پر ابوظبي د حوثي یاغیانو بریدونه شنډ کړي دي. د متحده عربي اماراتو د دفاع وزارت وایي چې تازه حوثي یاغیانو پر ابوظبي د بالستیک توغندیو د برید هڅه وکړه، خو دوی بریالي شول چې دغه برید شنډ کړي.
سرچینې ویلي چې په دې پېښه کې چا ته زیان نه دی اوښتی او د توغندیو پاتې شوني هم د ابوظبي نږدې سیمو کې لوېدلي دي. اماراتي چارواکو دغه راز ویلي چې دا برید د ایران له ملاتړ برخمنو حوثیانو کړی دی.
په وروستیو کې پر اماراتو د حوثي یاغیانو بریدونه ډېر شوي، چې شاوخوا لس ورځې وړاندې برید کې یې د ابوظبي هوايي ډګر په نښه کړی و او ګڼو کسانو ته یې مرګ ژوبله واړوله.
