مجاهد: له سعودي او ترکیې سره د پاکستان پوځي تړون د ا.ا لپاره د اندېښنې وړ نه دی

د ا.ا ویاند ذبیح‌الله مجاهد له یوې هندي رسنۍ سره په مرکه کې ویلي، له سعودي عربستان او ترکیې سره د پاکستان پوځي تړون د ا.ا لپاره د اندېښنې او ګواښ وړ نه دی. مجاهد ویلي، دغه هېوادونه د خپلو ګټو پر بنسټ تړونونه کوي او د نوموړي په باور، که دوی په کومه موضوع کې هوکړې ته ورسېږي، ا.ا به یې د اسلامي هېوادونو ترمنځ همکاري وبولي. هغه ټینګار کړی چې دا ډول همکارۍ د اسلامي نړۍ په ګټه دي او زیاته کړې یې ده چې ا.ا له هېڅ یوه یاد شوي هېواد سره دښمني نه لري. د ا.ا ویاند د پاکستان سره د وروستیو نښتو په اړه ویلي، وروستی برید د پاکستان له لوري پیل شوی، خو دوی دا موضوع یوه سیمه‌ییزه ستونزه بولي او د حل غوښتنه یې کوي.