د افغانستان پر وړاندې د نړیوالې ټولنې اوسنی چلند ناسم دی. نشنل انټرسټ نشريې په یوه تحلیل کې لیکلي دي چې په لومړي سر کې خو غربیان په غیر مسوولانه توګه له افغانستان ووتل او زرګونه کسان یې له ځان سره بوتلل او په دویم ګام کې یې پر افغانستان غیر قانوني اقتصادي فشارونه راوستل.
سرچینه کاږي چې د افغانستان پر وړاندې د غرب اوسنی چلند ناسم دی او زیاتوي چې له افغان حکومت سره تعامل ته لا هم ناوخته شوې نه ده. نشریه وايي د افغانستان اقتصادي وضعیت د اندېښنې وړ دی، د افغانانو شتمني باید ازاده کړل شي او په افغانستان کې د سترو تغیراتو لپاره باید له اوسني حکومت سره تعامل ته ادامه ورکړل شي.
نشنل انټرسټ دا هم وایي چې د تخلیې ماموریت د افغانستان په زیان و، ځکه زرګونه د کار خلک په دې ماموریت کې له افغانستان ایستل شوي او دا دغه هېواد ته ستره ضربه ده.
