د چين د شمېرنې ملي ادارې په دې وروستيو کې د جولای مياشتې د ملي اقتصاد معلومات خپاره کړي. دا معلومات ښيي، چې د چين ملي اقتصاد د ثبات او پرمختګ په حال کې دی. بهرنيو اقتصاد پوهانو ویلي، چې د پېچلي او ستونزمن بهرني چاپيريال پر وړاندې د چين د توليدي اړتياوو دوامداره پوره کېدو، د نويو خوځنده ځواکونو له پراختيا او د باکيفيته پرمختګ له پياوړتيا څخه د دغه هېواد انعطاف منونکی اقتصاد او اغېزمنې تګلارې څرګندې شوې دي. د اصلاحاتو د ژورتيا او د لوړې کچې د ورخلاصون د پراختيا په برخو کې د چين اقدامات د دغه هېواد د دوامدار اقتصادي پرمختګ لپاره ګټور دي او د نړيوال اقتصاد د بيا سمسورتيا او پرمختګ ټينګ ملاتړ به وکړي.
د چين رسمي شمېرنې ښيي، په تېر جولای کې چين کې د مصرفي توکو د پرچون خرڅلاو عمومي ارزښت ۳۷۷۵ ميليارډو او ۷۰۰ ميليونو يوانو ته رسېدلی او د تېر کال د همدې مياشتې په پرتله ۲،۷٪ زياتوالی ښيي. د سپورټي توکو توليدولو جرمني تصدۍ اډيډاس لومړي اجرائيوي مشر بجون ګولډن خبريال ته ويلي، چې له روغتيا سره د چيني مشتريانو علاقه ځکه لوړېږي چې سپورټي توکو ته د دوی اړتياوې د زياتوالي په حال کې دي. اډيډاس د چين بازار ته په درنه سترګه ګوري او په دغه هېواد کې به خپلې چارې پراخې کړي.
د چين اقتصاد د ثبات تر څنګ کيفيت يې هم لوړ شوی، د عنعنوي صنايعو د اصلاح او باکیفیته کېدو چارې روانې دي او نوې صنايع او د راتلونکې لپاره مهم صنایع مخ پر پياوړی کېدو دي. په تېر جولای کې چين کې د لوړې ټېکنالوژۍ د لويو توليدي چارو د زياتوالي اندازه د تېر کال د همدې مياشتې په پرتله ۱۰٪ زياته شوې.
د برېښنايي موټرو چيني تصديو په نړيوالو بازارونو کې د پام وړ پرمختګونه موندلي. د امريکا يوبر (Uber)، چې پر ګرځنده انترنیټ د ټکسي د غوښتلو خدمتي شرکت دی، په دې وروستيو کې يې اعلان کړی چې د چين بي وای ډي (BYD) به يوبر ته ۱۰۰ زره برېښنايي موټر برابر کړي او د دواړو خواوو ترمنځ همکاري به لومړی له اروپا او لاتيني امريکا څخه پيل شي او منځني ختيځ، استراليا او نوي زيلنډ ته به وغځېږي.
بلومبرګ خبري اژانس اټکل کړی، چې د چين د کورني توليد په عمومي ارزښت کې د نوې انرژۍ مصرفونکو موټرو، ليتيوم بټرۍ (lithium battery) او لمريزې انرژۍ توليداتو له صنايو پرته د لوړې ټېکنالوژۍ صنعتي چارو ونډه د ۲۰۱۸م کال له ۱۱٪ څخه د ۲۰۲۶م کال ۱۹٪ ته ورسيږي، که نوموړې درې صنايع په شمېرنه کې شامليږي، دغه ونډه به په ۲۰۲۶م کال کې ۲۳٪ ته لوړه شي.
د پاريس د اولمپيک لوبو په ترڅ کې، د چين علي بابا ډلې د فرعي شرکت علييون د کلاوډ اساسي تاسيساتو او خدمتي چارو تر ملاتړ لاندې د لوبو د ژوندې خپرونو سيګنال له ۲۰۰ زياتو هېوادونو او سيمو ته ليږلي. بر سېره پر دې، علي بابا ډلې پر همدې مهال په پاريس کې يو نندارتون جوړ کړی او نندارچيانو ته يې مصنوعي ځيرکتيا په مټ د شيانو اخيستلو د راتلونکې او نوې طريقې تجربې ورکړې. یوه فرانسوي ځوان ليوو جنار، چې له دغه نندارتون څخه يې ليدنه کړې، د چين د ټېکنالوژۍ ډېره ستاينه کړې.
په چيني چارو کې د برازيل د څېړنيز مرکز مدير روني لينس ويلي، چې چين د زرغونې ټېکنالوژۍ او ډيجيټلي اقتصاد په شمول د نويو صنايعو پرمختګ هڅوي او د چين په ملي اقتصاد کې د دغو صنايعو مهم رول لا څرګنديږي.
چين په روان کال کې د لوړې کچې د ورخلاصون لپاره د نظامونو او سيستمونو د بشپړولو لپاره یو لړ اقدامات کړي. د بهرنيو شخصيتونو په اند، چين د باکيفيته پرمختګ د پياوړتيا، د عمومي اقتصاد د ثبات او پرمختګ د ساتنې، د کورني پولي بازار د خونديتوب، د اصلاحاتو او ورخلاصون د پراختيا په هڅه کې دي او دغې هڅې به يې د نړۍ د اقتصادي پرمختګ، سوداګرۍ او ورخلاصون لپاره ګټورې وي او هم به نور زيات فرصتونه برابر کړي.
