نیویارک ټایمز؛ سوریه کې د امریکا له ټول‌وژنې پرده پورته کړې

نیویارک ټایمز ورځپاڼې د لومړي ځل لپاره له داعش ډلې سره د جګړې په لړ کې د امریکایي پوځیانو له ټول‌وژنې پرده پورته کړې ده. راپور کې راغلي چې په سوریه کې له داعش ډلې سره د امریکا د جګړې په لړ کې د متحده ایالاتو پوځیانو د ښځو او ماشومانو په ګډون ۷۰ کسان وژلي دي. راپور کاږي چې امریکا په ۲۰۱۹ میلادي کال کې د داعش ډلې په نوم پر ملکي وګړو د اف-۱۵ جنګي الوتکې په واسطه د دوه ټنه په اندازه چاودېدونکي توکي کارولي دي. د راپور له مخې، په یاد برید کې د ښځو او ماشومانو په ګډون ۷۰ ملکیان وژل شوي او تر سلو ډېر ټپيان شوي دي. د امریکا پوځ تر اوسه پورې په دې اړه څه نه دي ویلي.