د چين د دولت مرستيال رئيس هان جنګ د سپتمبر په ۱۸مې نېټې د ملګرو ملتونو په عمومي اسمبلۍ کې د ګډون په څنډه کې په جلا جلا توګه د ملګرو ملتونو له سرمنشي انتونيو ګوټرېش او د امريکا له بهرنيو چارو وزير انتوني بلينکن سره کتلي دي.
هان جنګ له ګوټرېش سره په کتنې کې ويلي، چې نړيواله ټولنه د پېچليو نړيوالو حالاتو پر وړاندې رښتيني څواړخيزم او د ملګرو ملتونو ځواکمنو کړنو ته اړتيا لري.
نوموړي ويلي، د انسانانو د ګډ برخليک ټولنې، يو کمربند او يوې لارې، نړيوال پرمختګ، نړيوال امنيت او نړيوال تمدون په اړه د چين د دولت رئيس شي جين پينګ وړانديزونه د ملګرو ملتونو له هيلو او موخو سره سمون لري او د نړيوالې ټولنې موافقه او ملاتړ يې تر لاسه کړی دی.
هان جنګ زياته کړې، چين به په مداومه توګه د نړيوالې سولې د جوړوونکي، د نړيوال پرمختګ د خدمت کوونکي او د نړيوال نظم د ساتوونکي رول ولوبوي او په نړيوالو چارو کې به د ملګرو ملتونو د مرکزي رول ملاتړ ته دوام ورکړي.
هان جنګ له انټونيو بلينکن سره په لېدنې کې د چين او امريکا ترمنځ جوړې او ثابتې اړيکې د دواړو هېوادونو او ګردې نړۍ لپاره ګټورې بللې دي.
نوموړي د چين پرمختګ د امريکا پر وړاندې ننګونه او خطر نه، بلکې فرصت او ګټوره چاره ياده کړې او په وينا يې، چين او امريکا ګډو برياليتوبونو او سمسورتيا ته لاس رسي لري.
هان جنګ زياته کړې، چې هېواد يې د امريکا په اړه پر مسلسلو او ثابتو تګلارو ټينګار لري او تل يې د چين او امريکا ترمنځ د اړيکو په چارو کې د متقابل درناوي، سوله ييز ګډ ژوند او همکارۍ پر اصولو ټينګار کړی دی. نوموړي هيله ښودلې، چې امريکا عادي مدار ته د دواړو هېوادونو د اړيکو د رستنېدو لپاره مناسبه زمينه برابره او د دواړو هېوادونو د متقابل درناوي او همکاريو د پياوړتيا لپاره رښتيني ګامونه پورته کړي.
