د چين د کمونېست ګوند د مرکزي کمېټې د سياسي بيورو غړي او د دې ګوند د مرکزي کمېټې د بهرنيو چارو د دفتر مسؤل وانګ يي د جولای په ۲۵مه نېټه په جوهانسبورګ کې د بريکس هېوادونو د امنيتي چارو د لوړې کچې استازو په ۱۳مه غونډه کې ګډون وکړ.
وانګ يي په خپلو خبرو کې وويل چې د څو کلونو په پرمختګ سره بريکس هېوادونه د نويو سمسورو بازاري او پرمختيايي هېوادونو د ګډ پرمختګ يو مهم ډګر ګرځېدلی دی. موږ د زمانې له تمايل سره سم په سم تاريخي لوري روان يو او د انسانانو د پرمختګ او ترقۍ په لور ولاړ يو چې همدا د بريکس هېوادونو ترمنځ د همکاريو بنسټ دی. بريکس هېوادونو د سياسي امنيت، سوداګريزو او پولي چارو او کلتوري برخو کې خپلمنځي همکارۍ پياوړې کړې او ترې يې ډېرې لاسته راوړنې درلودلې دي چې دا د همدغو همکاريو څخه د يادو هېوادونو د باور د ټينګښت سرچينه ده. د نويو سمسورو بازاري او پرمختيايي هېوادونو د وينا حقونه او اغېزه مو زياته کړې او بدلېدونکې نړۍ ته مو مثبت ځواکونه راوړي چې ورڅخه د دې همکاريو توان ښکاري. د نوي حالت پر وړاندې موږ دې د بريکس هېوادونو راتلونکي پرمختيایي لوری کنترول کړو، په سياسي چارو کې متقابل باور دې لا ټينګ کړو، خپلمنځي ستراتيژيکې همکارۍ دې پياوړې کړو، بايد په پر له پسې توګه د زمانې له غوښتنې سره سم نړيوالو ته عامه توليدات برابر کړو او د بريکس هېوادونو ترمنځ د همکاريو له لارې د ګډو برياليتوبونو د ټولشموله او پرانيستې روحيې په رڼا کې واقعي اقدامات غوره کړو څو د دغو هېوادونو ترمنځ د همکاريو طلايي برنډ جوړ کړو.
هغه په خپلو خبرو کې په اشارې ويلي چې که موږ له اوسنيو نړيوالو ننګونو سره مقابله وکړو او له امنيتي ستونزو څخه ووځو، بايد د متقابل درناوي پر بنسټ د ملګرو ملتونو منشور موخه او اصول مراعات کړو او متقابل امنيتي ګټو ته دې درناوی وکړو او د بېلابېلو هېوادونو لخوا د سیاسي نظامونو او پرمختيایي لارو د انتخابولو حقونو درناوی وکړو. موږ باید پر څو اړخيزم ټينګار وکړو، د ملګرو ملتونو په مرکزيت دې د څو اړخیز سيستم ساتنه وشي، د يو اړخیزم او بادارۍ مخنيوی وکړو او له هغو کړنو سره مخالفت کوو چې څو اړخيزې همکارۍ ته زیانونه رسوي. په ورته وخت کې موږ د عدالت پر بنسټ نړیوال قوانين او د نړيوالو اړيکو د منلو وړ اصول تعقيبوو او د خبرو اترو او مشورو له لارې کشالې او د نظريو توپيرونه لرې کوو او يو له بل د اړيکو له پرې کولو او د دوه ګوني معيارونو له غوره کولو سره مخالفت کوو. سربېره پردې موږ باید د يووالي او همکاريو له لارې له ډول ډول ننګونو سره مبارزه وکړو.
هغه په خپلو خبرو کې پر دې ټينګار کړی چې (The global South)يانې ټيټ عايد لرونکي هېوادونه د نويو بازاري او پرمختيایي هېوادونو ډله ده او په خپلو کورنيو چارو کې د بهرنيو ځواکونو د لاسوهنې د مخنيوي او د سياسي او واکمن امنيت د ساتلو مهمه دنده لري. موږ بايد خپله ستراتيژيکه اراده او باور ولرو، په ټينګه سره دې په خپل پرمختيايي لور روان شو، د ځينو کليدي او مهمو ګټو په هکله دې يو له بل څخه ملاتړ وکړو او د خپلو عملياتو له لارې دې د بريکس هېوادونو يووالي ته ورانوونکو کړنو او پر بريکس همکاريو تورونو ته ځوابونه ورکړو. موږ بايد د نړۍ جنوب-جنوب ترمنځ همکارۍ پياوړې کړو او د ټيټ عايد لرونکو هېوادونو يووالي ته دې لارښوونه وکړو څو ګډ دولتي امنيت او ثبات وساتو او مساوي او منظمه څو قطبيزه نړۍ اباده کړو.
هغه زياته کړې چې يووالی زموږ ځواک دی او د اقداماتو له لارې دې پرمختيایي لوری ومومو او ورخلاصون به زموږ خوځنده ځواک وي. چين غواړي چې له بريکس هېوادونو سره يو ځای د خپلو هېوادونو د امنيت او ثبات د ساتلو لپاره له هڅو څخه ملاتړ وکړي او له نړيوالو امنيتي ننګونو سره د مقابلې په برخه کې ورسره همکارۍ زياتې کړي څو نړيوال د بريکس هېوادونو غږ واوري او د دغو هېوادونو د رول د لوبولو عينی شاهد وي.
د خبر له مخې د جنوبي افریقا د جمهوري ماڼۍ وزيرې کومبودزو اېنتشاويني د دې غونډې مشري وکړه او د برازيل، روسيې او هند استازو پکې ګډون کړی و.
