د سينګاپور مخکېني صدراعظم لي سين لونګ په دې وروستيو کې له چين څخه ليدنه کړې او څرګندونو يې د نړيوالو پاملرنه راجلب کړې ده.
نوموړي چين ته د سفر پرمهال ويلي، د دغه هېواد پرمختګ پر سل کلن پلان پسې تړاو او اقتصاد يې ډېر پرمختیايي امکانات لري او د عصري کېدو پرمختيايي لاره يې پيدا کړې ده.
لي سين د چين پر راتلونکي پوره باور ښودلی او په خبره یې، دغه هېواد به خپل پرمختګ او سمسورتيا وساتي او د نړيوالې سولې او پرمختګ لپاره به لا زيات خدمتونه وکړي.
نوموړي د ورخلاصون، همکاريو، نړيوالې سولې او پرمختګ د پرمخبېولو په برخه کې د چين د هڅو هراړخيزه ارزونه کړې او د دغه هېواد د اقتصادي پرمختګ د کمزورتيا په تړاو نظرونو سره يې مخالفت ښودلی دی.
لي سين لونګ د سينګاپور صدراعظم و او د روان کال په مې کې يې دنده پای ته رسېدلې ده او تر هغه وروسته يې په لومړي ځل چين ته سفر کړی او د دغه هېواد له سو جو، بېجينګ او شانګهای ښارونو څخه يې ليدنه کړې ده.
ښاغلي لي سين لونګ يو مشهور تجربه لرونکی سياستوال او د چينايانو پخوانی ملګری دی او د ماموريت په مودې کې يې شاوخوا لس ځلې چين ته سفرونه کړي دي. د چين د پرمختیايي لارې او د بهرنيو تګلارو په هکله د ده او د ده د پلار شننو د نړيوالې ټولنې د سم تفاهم او پېژندګلوي لپاره مثبت رول لوبولی دی.
د چين دولت رئيس شي جين پینګ د نومبر په ۲۶مې نېټې په پلازمېنې بېجينګ کې له لي سين لونګ سره د ليدو پر مهال د دواړو هېوادونو د همکاريو لپاره د ده ملاتړ او هڅې ستايلي او د دوه اړخيزو همکاريو د دوام لپاره يې د نوموړي د هڅو هرکلی کړی دی.
لي سين لونګ د چين پر راتلونکي پوره باور ښودلی او ويلي يې دي، چې سينګاپور به له چين سره همکارۍ لا پياوړې کړي او د چيني شکله عصريتوب په جريان کې به فعال ګډون وکړي.
ولې ښاغلي لي د چين پر راتلونکي پوره باور ښودلی؟
دا د سينګاپور او چين د خپلمنځي همکاريو پر برياليو تجربو او د چين د ټولنيز او اقتصادي پرمختيايي تمايل په اړه د لي سين لونګ پر ژور او هراړخيز څار پسې تړاو لري او دغه راز نوموړي د اقتصاد د نړيوال کېدو، د ورخلاصون او اصلاحاتو د ژورتيا او د نړيوالو همکاريو د پرمخبېولو په برخو کې د يوه لوی هېواد په توګه د چین مسؤلانه رويه او کړنې هم درک کړې دي.
سينګاپور د چین د ورخلاصون او اصلاحاتو په جريان کې ژور ګډون لري.
د چين او سينګاپور صنعتي سيمه دېرش کاله دمخه په سو جو ښار کې جوړه شوې، چې اوس پر ابتکاري سيمې بدله شوې او د دواړو هېوادونو د همکاريو نمونه بلل کېږي.
سينګاپور له يوې خوا د چين له پرمختيايي تجربو ګټې اخيستي او له بلې خوا یې د چين د کرنې، بازار او اقتصاد د معلومولو فرصت ترلاسه کړی او د دغه هېواد له پرمختیايي ګټو څخه برخمن شوی دی.
چين په تېرې لسيزې کې د سينګاپور تر ټولو لوی سوداګريز همکار پاتې شوی او دواړو هېوادونو د ګډو ګټو پر بنسټ برياليتوبونه موندلي دي.
همدغو حقيقتونو ته کتو، د لي سين لونګ په شمول د سينګاپور سياستوالو باور ښودلی، چې نور هېوادونه هم د چين او سينګاپور له همکاريزو تجربو او د چين له پرمختګ څخه ګټې اخيستلی شي.
په وروستيو کلونو کې ځينو وګړو د چين د اقتصاد د سقوط پروپاګنډ خپاره کړي او پر همدې لارې غواړي، چې د چين د پرمختګ او ترقۍ مخه ونيسي، خو برعکس د چين اقتصاد ګام په ګام پرمختګ کوي.
شنونکي وايي، د نړيوال اقتصاد د کمزوري تګ پر وړاندې د چين اقتصادي بنسټ لاهم کلک دی او بنسټيز لامل يې دا ښيي، چې د دغه هېواد اقتصاد حياتي ځواک لري.
چين د باکيفيته توليدي ځواک د پارولو لپاره ډېرې هڅې کوي او د ورخلاصون د هراړخيز پراخوالي او د چيني شکله عصريتوب نوی مزل يې پيل کړی دی.
چينايان وايي، (باور د سرو زرو په پرتله ګرانبيه دی).
په نننۍ نړۍ کې د چين پر راتلونکي د لي سين لونګ ټينګ باور د دغه هېواد پرمختیايي راتلونکی روښانه کړی، چې د نړيوال پرمختیایي تمايل په اړه يې منطقي رويه هم ترې ښکاري.
