د نړیوالو شرکتونو شپږمه سرمشريزه څو ورځې وړاندې د چين د شان دونګ ولایت په چينګ داو ښار کې ترسره شوه. په چين کې د ايټاليې ايني(ENI) ګروپ د نمايدګي رئیس جواني چې په دغه سرمشريزه کې يې ګډون درلود، له سي جي ټي اېڼ سره د مرکې پرمهال چين له فرصتونو ډک او د باور وړ هېواد بللی دی. يه ياده سرمشريزه کې ډېرو نورو ګډونوالو هم د جواني په څېر پر چين باور څرګند کړی او دغه بازار يې مهم ستراتېژيک بازار او بې بديله برتري لروونکی بللی دی.
د نړیوالو شرکتونو په شپږمه سرمشريزه کې چې په چين کې د نړيوالو سرمايه ګذارانو لپاره ځانګړې شوې، د نړۍ د ۶ لویو وچو د ۴۶۵ شرکتونو ۵۷۰ استازو ګډون کړی و او د ۵ ميليارډو او ۹۳۰ ميليونو امريکايي ډالرو په ارزښت د ۴۰ مهمو پروژو تړونونه پکې لاسليک شوي دي. د يادونې ده چې په دې سرمشريزه کې ۱۳۱ ګډونوالو په لومړي ځل ګډون کړی و چې دغه شمېر د ټولو ګډونوالو ۲۳٪ برخه جوړوي. دغه راز د آسيان، منځني ختيځ او افريقا په شمول د نويو مخ پر وده هېوادونو ګډونوالو شمېر پکې ډېر زيات شوی وو.
په چين کې د جرمني د بوچ شرکت (Boch) د فرعي څانګې رئیس شودا چوان ويلي، د دوی شرکت چين ته اړتيا لري او د دغه هېواد د نوښت فرصتونه او چټک پرمختګ غواړي.
د ښاغلي شوداچوان يادو خبرو په چين کې د بهرنيو تصديو د ګډې هيلې ښودنه کړې، ځکه هغوی د چين له بازار، مستعدو کسانو او د نوښت له زمينو په کار اخيستنې په نړيوالو سياليو کې خپله برتري زياتولی شي.
د نړیوالو شرکتونو په شپږمه سرمشريزه کې د خپور شوي راپور له مخې، له ۲۰۱۳م کال څخه تر ۲۰۲۳م کال پورې په چين کې د لويو بهرنيو صنعتي تصديو د څېړونکو شمېر ٪ ۳۳.۲ زياتوالی او د څېړنو لګښت يې ٪ ۸۶.۵ زياتوالی ښيي.
د چين بازار لوی بالقوه ځواک ښيي. په ياده سرمشريزه کې ډېر ګډونوال پدې باور دي، چې د بيا استفاده کېدوونکو انرژيو، د سمندري اوبو د خوږولو او له هیدروجن (Hydrogen) انرژۍ د استفادې په برخو کې ډېر چټک پرمختګونه شوي دي. د روان کال په جنورۍ کې د سعودي عربستان د برېښنا او اوبو نړيوال شرکت د چين له دوو تصديو سره د ۳۱۲ ميليونو امريکايي ډالرو په ارزښت د پانګونې تړونونه لاسليک کړل. برسيره پردې د روان کال په لومړيو پنځو مياشتو کې د چين د برېښنايي سوداګريزو خدماتو، د فضايي او هوايي الو او تجهيزاتو، کيمياوي درملو او طبي وسايلو او تجهيزاتو د جوړولو په سکټورونو کې لګول شوې بهرنۍ پانګې په جلاجلا توګه ٪ ۱۴۶، ٪ ۷۴.۹، ٪ ۵۹.۲ او ٪ ۲۰ زياتوالی ښيي.
ثابتې او پرانيستې تګلارې د بهرنیو سرمايه ګذارانو لپاره ډېرې مهمې دي. چين د تولید په صنعت کې بهرنيو سرمايه ګذارانو ته د پانګونې لار پرانيستې او بيا يې د پانګونې په برخه کې خپل مقررات او معيارونه له نړيوالو مقرراتو او معيارونو سره برابر کړي او له ټولو اقتصادي شريکانو ته مساواتو او برابرۍ ته ژمن دی. د ډنمارک ګراندفوس ګروپ (Grundfos Group) تېر کال په چين کې د پمپونو د انرژۍ سپمولو د واحد معیار په ټاکلو کې شراکت وکړ او د دغه ګروپ چارواکي هه ليو يې په چين کې د خپلې تصدۍ د سوداګريزې لارې د پراخولو مهم ګام بللی دی.
چین دغه راز بهرنيو پانګونو ته پرله پسې اسانتياوې او غوره خدمتونه برابروي او له بهرنیو تصديو سره د لاپراخو سوداګريزو لارو په لټولو کې مرسته کوي. د بېلګې په توګه د بريټانيې استرازنکا شرکت (AstraZeneca) له چيني تصديو سره په ګډه نړيوال طبي صندوق جوړ کړی او تر اوسه يې ۲۷ تصديو ته يې پانګې ورکړې، څو د لا زياتو هېوادونو بازارونو ته خپل توليدات وړاندې کړي. د پاناسونيک (Panasonic) شرکت مشر جاو بينګ ډي وايي، شرکت يې په چين کې ۲۰ نوې پروژې پيل کړې او په چين کې پر خپلې سوداګرۍ ټينګار لري. مکډونالډس شرکت (McDonald’s) پلان لري چې په روان کال کې په چين کې ۱۰۰۰ نوي رسټورانټونه پرانيزي.
دا په داسې حال کې ده چې اوسمهال د يواړخيزم او پروټېکشنيزم څپې راپورته شوې، نړيوالو تصدیو د چين بازار انتخاب کړی، ځکه هغوی پدې ښه پوهيږي، چې د چين له لارې ځانونه له نړيوال بازار سره ښه اتصال کولی شي او د پانګونې ښه راتلونکي به ولري.
