په دې وروستيو کې د نړۍ لوی او مخکښ نفتي شرکت د سعودي ارمکو(Saudi Aramco)عمومي مدير امين ناصر د انرژۍ په ۲۶مه نړيواله غونډه کې ويلي چې اوس لمریزې برېښنا چارو ډېر پرمختګونه موندلي چې همدا په دې برخه کې د چين له خوا د لګښتونو له کمښت سره تړاو لري. د برېښنايي موټرو پرمختګ هم همداسې مخ ته روان دی.
دقیقاً چې د چین د نوې انرژۍ د چارو پرمختګ د لوېديځو هېوادونو له خوا صفر ته د کاربن دای اکسایډ د خپرېدا اندازې د رسېدو په تړاو د موخې د تر سره کېدو په ګټه دی او د نړيوالې انرژۍ د جوړښت د بدلولو لپاره يې مهم رول لوبولی دی.
په وروستيو ورځو کې ځينو امريکايي سياستوالو د چين اضافي توليدي وړتيا په تړاو ناسمې څرګندونې وکړې چې نړيوال بازار ته زيانونه رسوي، خو د ښاغلي ناصر له يادو خبرو څخه د چين د توليدي وړتيا په تړاو د نړيوالې ټولنې منطقي رويه ښکاري. د چين زرغون تولیدي وړتيا د نړۍ لپاره څه مانا لري؟ موږ کولی شو چې په حقيقتونو کې دغې پوښتنې ته تر ټولو ښه ځواب پيدا کړو.
اصلاً د اقتصادي پرمختګ موخه د خلکو د ژوند ښه والی دی. توليدوونکو د نوې انرژۍ د پرمختګ په برخه کې لا زرغون او فعال توليداتو ته پاملرنه کړې چې مشتريان او پيرېدونکي پکې هوساینه احساسولی شي. همدا راز یې د توليداتو بازاري اړتياوې پوره کړې، خو په ورته وخت کې لګښت او پانګه يې هم ډېره وه. چين د تخنيکي نوښت او بشپړ صنعتي ځنځيرونو په اتکأ سره د نړيوالو لپاره هغه لايحه چې لګښت يې مناسب دی، برابره کړې او د نوې انرژۍ د توليداتو پراخوالی يې پرمخ بېولی دی.
موږ برېښنايي موټر د یوې بېلګې په توګه وړاندې کوو. د ميکانسي شرکت يو راپور ښيي چې په چين کې د برېښنايي موټرو بيې د اروپايي شرکتونو له خوا د جوړو شويو همدغو موټرو د بيو په پرتله په سلو کې له شل څخه تر دېرش پورې کمې شوې دي. په دې جمله کې يو مهم لامل دا دی چې د چين له خوا د نوي موټر د جوړېدو وخت يوازې د اروپا له خوا د موټرو د جوړېدو د وخت نيمه برخه نيسي. له دې څخه ښکاري چې چين د زرغونې تولیدي وړتيا په لرلو سره د نړيوالو پيرېدونکو لپاره هغه توليدات چې بيې يې مناسبې او کيفیت يې ښه دی، برابر کړي او د عنعنوي انرژۍ د کمښت له امله يې د پيسو پړسوب فشارونه هم کم کړي چې مشتريان ترې واقعي ګټې اخيستې دي.
استراليايي سوداګر چې په ګوانګ جو ښار کې د چين د صادراتي او وارداتي توليداتو په ۱۳۵م نندارتون کې ګډون کوي، زموږ له خبريال سره د مرکې په ترڅ کې داسې ويلي چې د چين د نوې انرژۍ صنعتي پرمختګ نړيواله سيالي پرمخ بېولی چې پيرېدونکي ترې ګټې اخلي.
د چين د نوې انرژۍ تولیدي وړتيا د بېلا بېلو هېوادونو لپاره نوی پرمختيایي انجين برابر کړی دی. اوس مهال مختلفو هېوادونو د توليدي چارو د ښه والي او پر ټيټ کاربن لرونکو او زرغون چارو د پخوانیو صنعتي چارو د بدلولو لپاره هڅې کړې او د نوې انرژۍ د پرمختګ او کارونې لپاره اړوندو تجهيزاتو او پرزو ته اړتيا لري. چين په نړۍ کې د دواملرونکې انرژۍ د تر ټولو لوی بازار او د تجهيزاتو توليدوونکي هېواد په توګه په دې برخه کې مهم رول لوبولی دی. بلومبرګ په وروستيو کې ويلي چې په نړۍ کې د انرژۍ د جوړښت د بدلولو هيله زياتره د چين له خوا د ټيټه بيې لرونکو او پاکو توليداتو له برابرولو سره تړاو لري. اوس چين د نړۍ د بادي انرژۍ ۵۰ سلنه او ۸۰ سلنه فوتووالټیک(لمریزې برېښنا) تجهيزات برابر کړي دي. له ۲۰۱۲م کال څخه تر ۲۰۲۱م کال پورې د چين زرغونه سوداګريزه اندازه په سلو کې ۱۴۶ اعشاريه ۳ زياته شوې او نړيوال اقتصادي پرمختګ به په خوځښت راولي.
دا د پاملرنې وړ خبره ده چې د انرژۍ جوړښت د بدلولو په بهير کې د تخنيکي ستونزو لرې کول يو کليدي برخه بلل کېږي. چينايي تصدۍ د نوښت له لارې د يادو ستونزو د له منځه وړلو لپاره ډېرې نړيوالې لايحې جوړې کړې او نړيوال تخنیکي او صنعتي پرمختګ يې پرمخبيايي.
د تش په نامه د چين د اضافي تولیدي وړتيا په تړاو د امريکا په مشرۍ د لوېديځو هېوادونو څرګندونې بې ځایه دي. لکه څنګه چې ځينو نړيوالو شخصيتونو ویلي و، امريکا د چين د اضافي توليدي وړتيا په پلمه سوداګرۍ محاصره کوونکې کړنې کوي چې همدا به يوازې د نړيوالۍ انرژۍ نوي جوړښت ته زیان ورسوي.
